ފުލުހުން ބުނަނީ ހުކުރުދުވަހު ބާއްވާ ސިޔާސީ ހަރަކާތުގެ ނިޔަތް ރަނގަޅު ނޫންކަމަށް

ޤާނޫނީޫ އިމުގެ ތެރެއިން ސުލްހަވެރި ސިޔާސީ ހަރަކާތްތައް ކުރިއަށްގެންދިއުމަށް ފުލުހުންގެ ފަރާތުން އެއްބާރުލުން ލިބޭނޭކަމަށާއި، ނަމަވެސް އުސޫލްތަކާ ހިލާފަށް ކަންކަން ކުރާނަމަ ހުއްޓުވާނޭކަމަށް ފުލުހުން ބުނެފިއެވެ.

އިދިކޮޅު ސިޔާސީ ފަރާތްތަކުން ވަނީ އަންނަ ހުކުރުދުވަހު "ލޫޓުވައިފި ލޫޓުވައިފި" ނަމުގައި ސަރުކާރު ޖަވާބޔުދާރީ ކުރުވުމުގެ ނަމުގައި މަގުމަތީ ހަރަކާތެއް ކުރިއަށްގެންދިއުމަށް ނިންމާފައެވެ. މިކަމާ ގުޅިގެން ފުލުހުން މިއަދު ނެރުނު ބަޔާނެއްގައި ބުނެފައިވަނީ، އެއްވެ އުޅުމުގެ މިނިވަންކަމުގެ ގާނޫނު" އާއި އެގާނޫނަށް އިސްލާހު ގެނެސްފައިވާ ގާނޫނުތަކުގައި ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ހައްގު ބޭނުންކުރުމުގެ ހަމަތައް ބަޔާންކޮށްފައިވާއިރު، އެ ބީދައިން ސުލްހަވެރިކަމާއެކު ކުރިއަށްގެންދެވޭ ހަރަކާތްތަކަށް ފޯރުކޮށްދޭންޖެހޭ ރައްކާތެރިކަމާއި، އެފަދަ ހަރަކާތްތައް ހިންގޭ ސަރަހައްދުތަކުގެ މަގުތަކާއި އެހެނިހެން ތަންތަނުގެ ސަލާމަތާއި ރައްކާތެރިކަން ބެލެހެއްޓުމުގެ އިންތިޒާމުތައް ހަމަޖެއްސުމުގެ ކަންކަން ފުލުހުންގެ ފަރާތުން ކުރަމުންދާނޭކަމަށެވެ.

ނަމަވެސް، ފުލުހުން ހުއްދަ ދީފައިވާ ރޫޓާ ޚިލާފަށް، ހިނގާލުން ކުރިއަށް ގެންގޮސް އެކި ބައިބަޔަށް ބެހި ކުށްކުރާ ގްރޫޕްތައް މަގުމައްޗަށް ނެރެ މާލެތެރެ ހަލަބޮލިކޮށް ތަންތަނަށް ގެއްލުން ދިނުމަށް ރާވާފައިވާކަމުގެ މައުލޫމާތު ފުލުހުންނަށް ލިބިފައިވާކަމަށް ފުލުހުން ވަނީ ބުނެފައެވެ.

މިފަދަ އަމަލުތަކަކީ މާލޭގެ އަމަން އަމާންކަމާއި އާންމު މަސްލަހަތު ގެލިދާނެ ކަންކަން ކަމުގައި ފާހަގަކުރަމުން ފުލުހުން ވަނީ ސުލްހަވެރި ހަރަކާތެއްގެ ނަމުގައި ކުރިއަށް ގެންދިއުމަށް ހަމަޖެހިފައިވާ މި ހަރަކާތުގައި، ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ގާނޫނާ ހިލާފު އަދި އަމަން އަމާންކަމަށް ނުރައްކާވެދާނެ އެއްވެސް އަމަލެއް ހިންގުމަށް ހިތްވަރު ނުދިނުމަށް މި ޚިދުމަތުން ގޮވާލަފައެވެ. އަދި، މާލެ ހަލަބޮލިކޮށް ތަންތަނަށް ގެއްލުންދޭން ފުރުސަތު ނުދޭނޭކަމަށްވެސް ފުލުހުން ވަނީ ބުނެފައެވެ.

އެގޮތުން ފުލުހުން ވަނީ ހުކުރުދުވަހު ބާއްވާ ހަރަކާތް ކުރިއަށްދާއިރު، އާންމު ރައްޔިތުންގެ ރައްކާތެރިކަން ކަށަވަރުކުރުމަށް ހަރަކާތްތެރިވާ ފަރާތްތަކަށް އެއްބާރުލުން ދީ، އެންމެހާ ރައްޔިތުންގެ ހައްގުތަކަށް އިހުތިރާމު ކޮށް މުޖުތަމައުގެ އާންމު މަސްލަހަތަށް އުނިކަމެއް ނާންނާނެ ގޮތަށް ހަރަކާތް ކުރިއަށް ގެންދިއުމަށް އިލްތިމާސްކޮށްފައެވެ.