ދަ ޑިމޮކްރެޓްސް ގެ އިސް މަގާމުގައި ތިބި ފަރާތްތަކެއް މަގާމުން އިސްތިއުފާ ދީފި

ދަ ޑިމޮކްރެޓްސް ގެ އިސް މަގާމުގައި ތިބި ފަރާތްތަކެއް އެ މަގާމުން އިސްތިއުފާ ދީފިއެވެ.

މިގޮތުން ދަ ޑިމޮކްރެޓްސް އިސްތިއުފާ ދިން މަގާމް ތަކުގެ ތެރޭގައި އައްޑޫ ހިތަދޫ ދެކުނު ދާއިރާގެ ޔަންގް ޑެމްސް ލީޑަރާއި ޑިމޮކްރެޓްސް ގެ މަހިބަދޫ ދާއިރާގެ ރައީސް ހިމެނެއެވެ.

މީގެ އިތުރުންވެސް މިދިޔަ ހަފްތާގެ ތެރޭގައި އެ ޕާޓީގެ ކޮލަމާފުށި އަދި އައްޑޫ ސިޓީ ހުޅުދޫ ދާއިރާގެ ރައީސް އާއި، އައްޑޫ ސިޓީ ވިމެންސް ޑިމޮކްރެޓް ލީޑަރ ވެސް ވަނީ ޕާޓީގެ މި މަގާމް ތަކުން އިސްތިއުފާ ދީފައެވެ.

އެ ފަރާތްތަކުން ޕާޓީގެ މި މަގާމްތަކުން އިސްތިއުފާ ދިން ސަބަބު ތަކުގެ ތެރޭގައި އެންމެ އެދެވޭ މިންވަރާއިވެސް ގާތަށް ޕާޓީގެ ޒުވާނުންގެ ކަންކަމުގައި ޕާޓީން އަޅާނުލުމާއި، މިކަންކަމާއި މެދު ޕާޓީން އިހުމާލުވެ، މިދިޔަ އަހަރުގެ ޑިސެންބަރު މހުގެ 2 ވަނަ ދުވަހު ބޭއްވުނު އެތެރޭގެ އިންތިހާބުގެ ދާއިމީ ނަތީޖާ އަދިވެސް ޕާޓީން ސާފުކޮށްދީފައި ނުވުން ހިމެނެއެވެ.

މި މަގާމްތަކުން އިސްތިއުފާ ދީފައިވާއިރު، ޕާޓީގެ އިންތިހާބު ނުބާއްވާ ފަސްކުރަމުންދާތީ ދަ ޑިމޮކްރެޓްސް އަށް ނިސްބަތްވާ ގިނަ މެމްބަރުންތަކެއް ނުރުހުން ފާޅު ކުރަމުން ދަނިކޮށް އެޕާޓީން ވަނީ ޕާޓީގެ އެތެރޭގެ އިންތިހާބުން ބާތިލު ކުރި މަގާމްތަކުގެ އިންތިހާބު މި ފެބްރުއަރީ މަހުގެ 14 ވާ ހޮނިހިރު ދުވަހު ބޭއްވުމަށް ނިންމާފައެވެ.

މި މަގާމްތަކުގެ ނަތީޖާ އެ ޕާޓީ އިން ބާތިލު ކުރީ އެޕާޓީގެ ފުރަތަމަ ދައުރުގެ މަގާމުފުރާތަކުގެ އިންތިހާބުގައި، އިންތިހާބީ ޝަކުވާތަކާއި، ވަގުތީ ނަތީޖާއަށް ލިބުނު ޝަކުވާތަކާއި އަދި ވޯޓު ހައްގުވާ މިންވަރަށްވުރެ އިތުރަށް ވޯޓް ކަރުދާސް ދޫކޮށްފައިވާ ފޮށިތަކުގެ ނަތީޖާތައް ވަޒަންކުރުމަށްފަހު، އެ ޕާޓީގެ ވަގުތީ އިންތިހާބާއި ބެހޭ ކޮމިޓީއިން ނެވެ.