އަންނަ ހަފުތާގެ ބުރާސްފަތި ދުވަހަކީ ސަރުކާރު ބަންދު ދުވަހެއްކަމުގައި ނިންމަވައިފި

މިއަހަރުގެ ޤައުމީ ދުވަހުގެ މުނާސަބަަތާ ގުޅިގެން ސެމްޕްޓެމްބަރ 5 ވާ ބުރާސްފަތި ދުވަސް ސަރުކާރު ބަންދު ކުރަން ރައީސް ނިންމަވައިފިއެވެ.

ރައީސް އޮފީހުން މިއަދު ހާމަކުރި ގޮތުގައި، މިއަހަރުގެ ޤައުމީ ދުވަހުގެ މުނާސަބަތާ ގުޅިގެން އަންނަ ހަފުތާގެ ބުރާސްފަތި ދުވަސް، ސެޕްޓެންބަރު 5 ވަނަ ދުވަހަކީ ސަރުކާރު ބަންދު ދުވަހެއްކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިކަމުގައެވެ.

ޤައުމީ ދުވަހަކީ އުތީމު ބޮޑުތަކުރުފާނު ޕޯޗުގީޒުންގެ އިސްތިޢުމާރުން ދިވެހިރާއްޖޭގެ ދީނާއި މިނިވަންކަމާއި ރައްޔިތުން ސަލާމަތްކުރެއްވި ދުވަހެވެ. މި ތާރީޚީ ހާދިސާ ހިނގާފައިވަނީ ހިޖުރީ ސަނަތުން 981 ވަނަ އަހަރުގެ ރަބީޢުލްއައްވަލް މަހުގެ 1 ވަނަ ދުވަހުއެވެ.

އަންނަ ހަފްތާގެ ބުރާސްފަތި ދުވަސް ބަންދުރަން ސަރުކާރުން ނިންމަވާފައިވާއިރު، މި މަހުގެ 13 ވަނަ ދުވަސް ވެސް ވަނީ ސަރުކާރު ބަންދު ދުވަހެއްގެ ގޮތުގައި ކަނޑައަޅުއްވާފައެވެ. އެ ދުވަސް ބަންދު ކުރެއްވުމަށް ނިންމެވީ މޫސުން ގޯސްވުމާ ގުޅިގެންނެވެ.