ރޯދަ މަހު ސްކޫލްގައި ކިޔެވުން އޮންނާނީ ފުރަތަމަ ހަފުތާގައި އެކަނި

ކުރިއަށްއޮތް ރަމަޟާންމަހު ސްކޫލްތަކުގައި ކިޔެވުން އޮންނާނީ ފުރަތަމަ ހަފުތާގައި އެކަނި ކަމަށް އެޑިއުކޭޝަން މިނިސްޓްރީގެ އެކަޑަމިކް ކަލަންޑަރުން ދައްކައިފިއެވެ.

މި ފެށޭ ދިރާސީ އާ އަހަރުގެ ކަލަންޑަރު އިއްޔެ މިނިސްޓްރީން ވަނީ އަލުން އާންމުކޮށްފަ އެވެ. މި ކަލަންޑަރުގައި ވާގޮތުން، ދިރާސީ އައު އަހަރުގެ ކިޔަވައިދިނުން ފެށުމަށް ހަމަޖެހިފައިވަނީ އަންނަ އަންގާރަ ދުވަހެވެ.

މި ކަލަންޑަރުގައި ވަނީ ސަރުކާރު ބަންދު ދުވަސްތަކާއި ސްކޫލްތަކުގައި ކިޔަވައިދޭ ދުވަސްތަކާއި ދަރިވަރުންނާއި ޓީޗަރުންނަށް ބަންދު ދުވަސްތައް ވެސް އާންމުކޮށްފަ އެވެ.

މި އަހަރުގެ ރޯދަ މަސް ފެށެނީ ޖެނުއަރީ 18 ގަ އެވެ. އެހެންކަމުން، އަންނަ އަންގާރަ ދުވަހުން ފެށިގެން ކިޔެވުން ކުރިއަށް ގެންދާނީ އެއް މަސް ދުވަހަށެވެ. އޭގެ ތެރެއިން ކިޔަވައިދޭ ފަހު ހަފުތާ ވަނީ ރޯދަ މަހުގެ ފުރަތަމަ ހަފުތާއަށެވެ. އެއީ އެ މަހުގެ 22 އިން 26 އަށެވެ.

އެއަށް ފަހު ޖެހިގެން އަންނަ ހުކުރާއި ހޮނިހިރަށް ފަހު މާޗް 1 އިން 8 އަށް ވަނީ ޓީޗަރުންގެ ޕީޑީ ދުވަހުގެ ގޮތުގައި ކަނޑައަޅާފައެވެ. އެހެންކަމުން އެ ދުވަސްތަކުގައިވެސް ދަރިވަރުން ސުކޫލަށް ދާކަށް ނުޖެހޭނެއެވެ.

ޕީޑީ ދުވަސްތަކަށްފަހު ޖެހިގެން އަންނަ ދުވަހަކީ ރޯދައިގެ ފަހު 10 ފެށޭ ދުވަހެވެ. އެހެންކަމުން އެ ދުވަސްތަކަކީ ސަރުކާރު ބަންދު ކޮށްފައިވާ ދުވަސްތަކެއްކަމުން އެއީ ދަރިވަރުންނަށް ބަންދު ދުވަސްތަކެކެވެ.

ކަލަންޑަރުގައިވާ ގޮތުން ރޯދަ މަސް ނިންމައި ސްކޫލްތަކުގައި އަލުން ކިޔަވައިދޭން ފަށާނީ މާޗް 23 ގައެވެ.