މަޖިލީހަށް އަދާލަތު ޕާޓީން ވާދަކުރާ 4 ދާއިރާ އަށް، ޕާޓީ ޓިކެޓްގައި ވާދަކުރުމުގެ ފުރުޞަތު ހުޅުވާލައިފި!

ކުރީ ސަރުކާރުގައި، ވެރިކަންކުރި އެމްޑީޕީ އާއެކު ކޯލިޝަން ހެދި، އަދާލަތު ޕާޓީއިން ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ހަތަރު ދާއިރާއަކަށް ވާދަކުރަން ނިންމައި އެ ޕާޓީގެ ޓިކެޓަށް އެދި ހުށަހެޅުމުގެ ފުރުސަތު ހުޅުވައިލައިފިއެވެ.

އަދާލަތު ޕާޓީއިން އިއްޔެ ނެރުނު އިއުލާނެއްގައި ބުނެފައިވަނީ މި އަހަރު ބޭއްވުމަށް ހަމަޖެހިފައިވާ 20 ވަނަ ރައްޔިތުންގެ މަޖިލީހުގެ އިންތިޚާބުގައި ޕާޓީގެ ޓިކެޓުގައި ވާދަކުރުމަށް އެދޭ ފަރާތްތަކުން ޓިކެޓަށް އެދި ހުށަހެޅުމަށް ހުޅުވައިލާ ކަމަށެވެ.

އެގޮތުން އެޕާޓީން މިފަހަރު މަޖިލިސް އިންތިޚާބުގައި ވާދަކުރަން ނިންމާފައިވާ ދާއިރާ ތަކަކީ ވައިކަރަދޫ ދާއިރާއާއި މަކުނުދޫ ދާއިރާއާއި އިނގުރައިދޫ ދާއިރާ އަދި ފެލިދޫ ދާއިރާ ކަމަށް އިއުލާނުގައި ވެއެވެ.

މި ދާއިރާތަކަށް ކުރިމަތިލުމުގެ ފުރުސަތު މި މަހުގެ 23 ވާ އަންގާރަ ދުވަހުގެ 16:00 ގެ ނިޔަލަށް ހުޅުވާލާފައިވާ ކަމަށް އެ ޕާޓީން ބުނެފައިވެއެވެ.

މިހާރު ކުރިއަށްދާ 19 ވަނަ މަޖިލީހުގެ އޮންތިޚާބުގައިވެސް އަދާލަތުން ނުވަ ދާއިރާއަކަށް ވާދަކުރިއެވެ. އެ ދާއިރާތަކަކީ މަކުނުދޫ ދާއިރާއާއި ވައިކަރަދޫ ދާއިރާއާއި ކެލާ ދާއިރާއާއި ގައްދޫ ދާއިރާއާއި އިނގުރައިދޫ ދާއިރާއާއި މަހިބަދޫ ދާއިރާއާއި ކާށިދޫ ދާއިރާއާއި ނިލަންދޫ ދާއިރާ އަދި މުލަކު ދާއިރާއެވެ.

ނަމަވެސް އެތަނުން އެއްވެސް ދާއިރާއެއްގެ ގޮނޑި އެ ޕާޓީއަށް ލިބުފައެއް ނުވެއެވެ.

އޭގެ ކުރިން އޮތް 18 ވަނަ މަޖިލީހުގައި އަދާލަަތަށް 1 ގޮނޑި ލިބިފައިވާއިރު، އެއީ އަނާރާ ނަޢީމް ވާދަކުރެއްވި މަކުނުދޫ ދާއިރާގެ ގޮނޑިކަން ފާހަގަކޮށްލަންޖެހެއެވެ.

މިއަހަރު ބާއްވާ މަޖިލިސް އިންތިޚާބު އޮންނާނީ މާރިޗު މަހުގެ 17 ވަނަ ދުވަހު ކަމަށް އީސީން ވަނީ އިއުލާންކޮށްފަ އެވެ. މިއީ ރޯދަ މަހުގެ 7 ވަނަ ދުވަހެވެ.