ނޭޕާލުގެ އައު ބޮޑުވަޒީރަށް ރައީސް ޑރ.މުޢިއްޒު މަރުހަބާ ދަންނަވައިފި
ނޭޕާލުގެ އައު ބޮޑުވަޒީރުކަމަށް އައްޔަނުކުރެވުނު ކޭޕީ ޝަރުމާ އޯލީއަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މަރުހަބާ ދަންނަވައިފިއެވެ.
ރައީސް ޑރ.މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، ނޭޕާލުގެ ބޮޑުވަޒީރުކަމަށް އައްޔަނުކުރެވިފައިވާތީ، އޯލީއަށް މަރުޙަބާ އަދި ހެޔޮއެދުންތައް އަރިސްކުރައްވާ ކަމަށެވެ.
ދިވެހިރާއްޖެއާއި ނޭޕާލްގެ ރައްޔިތުންގެ މެދުގައި ވަރަށް ގާތް ގުޅުމެއް އޮންނަކަން ފާހަގަކުރައްވާ ރައީސް ޑރ.މުޢިއްޒު ވަނީ ދެ ޤައުމުގެ ދެމެދުގައި ގުޅުން އިތުރަށް ފުޅާކުރުމަށްޓަކައި އެކުގައި މަސައްކަތްކުރެއްވުމަށް އުންމީދުކުރައްވާކަމަށް ވިދާޅުވެފައެވެ.
އެގައުމުގެ ރައީސް ރާމްޗަންދްރާ ޕައުޑެލް، ނޭޕާލްގެ ވާތްފަރާތުގެ ކޮމިއުނިސްޓް ޕާޓީ (ޔުނިފައިޑް މާކްސިސްޓް-ލެނިނިސްޓް) އަށް ނިސްބަތްވެވަޑައިގަންނަވާ އޯލީ، އެގައުމުގެ ބޮޑުވަޒީރުކަމަށް އައްޔަނުކުރެއްވީ އެމަގާމުގައި ކުރިން ހުންނެވި ޕުޝްޕަ ކަމާލް ދަހަލްގެ އިތުބާރު ނެތްކަމަށް އެގައުމުގެ ޕާލިމެންޓުން ފާސްކުރުމާއި ގުޅިގެންނެވެ.
ބޮޑު ވަޒީރު ކަމުގެ ހަތަރުވަނަ ދައުރަކަށް އައްޔަނުކުރެވުނު އޯލީ ވަނީ 2015-2016 އަށާއި 2018 އިން ޖުލައި 2021 އަށް ވަކި ދެ ދައުރެއްގައި އެގައުމުގެ ބޮޑުވަޒީރުކަމުގެ މަގާމް ފުރުއްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
