މާރިޔާ ދީދީ ތުރުކުރެއްވި ހެދުމަށް ފާޑުކިއުން

ޑިފެންސް މިނިސްޓަރ އިންޑިޔާއަށް ކުރައްވާ ދަތުރުފުޅުގައި ތުރުކުރައްވައިގެން އުޅުއްވި ހެނދުންކޮޅާއިމެދު ބައެއް މީހުން ހިތްހަމަނުޖެހިގެން އެބައުޅުއްވައެވެ.

ހިތްހަމަޖެހިވަޑައިނުގެން އެވާހަކަފުޅު ދެއްކެވި އެއްބޭފުޅަކީ އަދުނާން ހުސައިންގެ ބޭފުޅެއްކަމަށްވާ މުހައްމަދު މުއިއްޒު އަދުނާނެވެ. އޭނާ ވިދާޅުވެފައިވެއެވެ. "އިސްލާމީ ގައުމު ތަމްސީލުކުރައްވާ ފިރިހެން އަދި އަންހެން މިނިސްޓަރުންނާއި ސަފީރުންފަދަ ބޭފުޅުން އެގައުމެއްގެ އިސްލާމީ، ގައުމީ، ސަގާފަތް ފެންނަކަހަލަ ހެދުންކޮޅު ތުރުކުރެއްވުން ރަނގަޅުވާނެއެވެ. ބިދޭސީ، ފަރަންޖީހެދުން ތުރުކުރެއްވުމަށްވުރެ"

ޑިފެންސް މިނިސްޓަރ މާރިޔާ އިންޑިޔާގެ ޑިފެންސް މިނިސްޓަރާއި ބައްދަލުކުރެއްވިއިރު އިންޑިޔާގެ ޑިފެންސް މިނިސްޓަރ ހުންނެވީ އެގައުމުގެ އަންހެނުންގެ ގައުމީ ހެދުންކަމުގައިވާ ސާޅީގައެވެ.

މާރިޔާ ދީދީ ތުރުކުރައްވައިގެން ހުންނެވީ، އިނގިރޭސި އަންހެން ބޮޑުވަޒީރު، އަދި ބައެއްފަހަރު އިނގިރޭސި ރާނީ ތުރުކުރައްވާކަހަލަ ކަށިމަތީގެ ރީތިކަން ފެންނަ ރީތި ހެދުންކޮޅެކެވެ.

އާއްމުގޮތެއްގައި އެފަދަ ރަސްމީ އިވެންޓްތަކުގައި ޚާއްސަކޮށް ބޭރުގައުމުތަކަށް ވަޑައިގަންނަވާއިރު އެފަދަ މަގާމްތަކުގައި ތިއްބަވާ ރާއްޖޭގެ އަންހެން ބޭފުޅުން މީގެކުރިން ތުރުކުރައްވާތަން ފެންނަނީ މުހައްމަދު އަމީން އަންހެންބޭފުޅުންނަށް ޑިޒައިންކޮށްދެއްވި ދިގު ހެދުމެވެ.

އެއީ ދިވެހި ކަނބަލުން ރަސްމީ ދިވެހި ރަސްމީ ހެދުންކޮޅެވެ. މާރިޔާ ދީދީ ތުރުކުރައްވައިގެން ހުންނެވީ ދިވެހި ވިޔަސް ނުވިޔަސް، އެކަމަނާ ލޯބިކުރައްވާ ހެދުމެވެ.

އެއީ އެކަމަނާގެ ސްޓައިލެވެ. އެއީ ފަރަންޖީ ހެދުމެކޭ ބުނަންވީތޯއެވެ. ސޯޝަލްމީޑިއާގައި ފެންނަނީ މުއިއްޒު އަދުނާންގެ ވާހަކަފުޅަށް ތާއީދުކުރާ ބަޔަކާއި މާރިޔާގެ ސްޓައިލަށް ތާއީދުކޮށް މަރުހަބާ ކިޔާ ބައެކެވެ.