ޕީއެންއެފްގެ ވޭކަޕް ޖަލްސާ ކެންސަލެއް ނުވޭ، ކުރިއަށް ދާނެ

ކުރީގެ ރައީސް އަބްދުﷲ ޔާމީންގެ ޕީޕަލްސް ނެޝަނަލް ފްރަންޓް (ޕީއެންއެފް) އިން އާޓިފިޝަލް ބީޗުގައި މާދަމާ ރޭ ބާއްވަން ނިންމާފައިވާ ޖަލްސާ ކެންސަލް ނުވާ ކަމަށާ އެ ޖަލްސާ ކުރިއަށް ދާނެ ކަމަށް އެ ޕާޓީން ބުނެފި އެވެ.

މާދަމާ ރޭގެ ޖަލްސާ ބާއްވަނީ "ވޭކަޕް" ނަމުގަ އެވެ. މި ޖަލްސާ އަކީ އެ ޕާޓީން ބާއްވާ ފުރަތަމަ ބޮޑު ޖަލްސާ އެވެ.

އެ ޕާޓީން މިރޭ ބުނީ މާދަމާ ރޭ ބާއްވާ ގައުމީ އިވެންޓަށް ރައީސް މުއިއްޒު އިސްވެ ހުންނަވާ ހުރަސް އަޅުއްވަމުން ގެންދަވާ ކަމަށެވެ. އެއީ ވަރަށް ދެރަވަރު ކަމެއް ކަމަށް ވެސް ބުންޏެވެ. އެެހެންނަމަވެސް ރޭވިފައިވާ ގޮތަށް މާދަމާ ރޭ 8:30 ގައި އާާޓިފިޝަލް ބީޗުގައި އިވެންޓު ކުރިޔަށްދާނެ ކަމަށް އެ ޕާޓީން ބުންޏެވެ.

".. އިވެންޓު ކެންސަލް ނުވޭ. ކުރިޔަށް ދާނެ," އެ ޕާޓީގެ އިސް ބޭފުޅެއް ކަމަށްވާ ކުރީގެ ސައިންސް މިނިސްޓަރު މަލީހް ޖަމާލް ވިދާޅުވި އެވެ.

ސިޔާސީ މައިދާނުގައި މިވަގުތު ވެސް އެންމެ ހަރަކާތްތެރި އެއް ޕާޓީއަކީ ޕީއެންއެފް އެވެ. އެ ޕާޓީން ދަނީ ކޮންމެ ހަފްތާއަކު ވެސް ފްރަންޓް އޮފީހުގައި ޖަލްސާ ބާއްވަމުންނެވެ. އެ ޖަލްސާތަކުގައި ކުރީގެ ރައީސް ޔާމީން ވެސް ބައިވެރިވެވަޑައިގަންނަވާ ވާހަކަފުޅު ދައްކަވަ އެވެ.

ބުރާސްފަތި ދުވަހުގެ ރޭގެ ޖަލްސާގައި ރައީސް ޔާމީން ވެސް ބައިވެރިވެވަޑައިގަންނަވަ އެވެ. އަދި ވާހަކަފުޅު ދައްކަވާނެ އެވެ. ޔާމީން ގެންދަނީ މި ސަރުކާރާއި އިދިކޮޅު އެމްޑީޕީއަށް ވަރަށް ބޮޑަށް ފާޑު ވިދާޅުވަމުންނެވެ.