ހިޔާ ކުލީގެ ގޮތުގައި 5600ރ ނެގުމަށް ރައީސް ޔާމީންވެރިކަމުގައި ވަނީ ރަސްމީކޮށް ނިންމާފައި: ޑރ މުއިއްޒު

ނިމިދިޔަ ރައީސް ޔާމީން ސަރުކާރުން ފަށާފައިވާ ހިޔާ މަޝްރޫއުގެ ދަށުން ހުޅުމާލޭގައި އަޅަންފަށާފައިވާ 7000 ފްލެޓްގެ ޕްރޮޖެކްޓް ފްލެޓްގެ ކުލީގެ ގޮތުގައި ރައީސް ޔާމީން ސަރުކާރުން ނެގުމަށް ނިންމާފައިވަނީ 5،600 ރުފިޔާ ކަމަށް ކުރީގެ ހައުސިންގ މިނިސްޓަރ އަދި ޕީޕީއެމްގެ ނައިބް ރައީސް ޑރ މުހައްމަދު މުއިއްޒު ވިދާޅުވެއްޖެއެވެ.

ޑރ މުއިއްޒު މިހެން ވިދާޅުވެފައިވަނީ މިއަދު އެޗްޑީސީން ބޭއްވި ނޫސްވެރިންގެ ބައްދަލުވުމުގައި ހިޔާ ފްލެޓްގެ ކުލީގެ ގޮތުގައި 11،000 ނެގުމަށް ނިންމާފައިވާކަން ހާމަކޮށްފައިވަނިކޮށެވެ. އަދި މިިހާ ބޮޑު ކުއްޔެއް ނަގަން ޖެހިފައިވަނީ ރައީސް ޔާމީންގެ ވެރިކަމުގައި މިކަން ކޮށްފައިވާ ގޮތުންކަމަށް އެޗްޑީސީގެ މެނޭޖިންގ ޑިރެކްޓަރު ސުހެއިލު ވިދާޅުވެފައިވަނިކޮށެވެ.

ޑރ މުއިއްޒު ވިދާޅުވިގޮތުގައި ހިޔާ މަޝްޢޫގެ ފްލެޓްގެ މަހުގެ ކުލީގެ ގޮތުގައި 11،000 ޖެހޭ ކަމަށް އެޗްޑީސީން ބުނުމަކީ އެއްވެސް ޓެކްނިކަލް މިންގަނޑަކުން އަސާސެއް އޮތްކަމެއް ނޫންކަމަށް ވިދާޅުވެފައެވެ.

މީގެ އިތުރުން އެޗްޑީސީގެ ހިސާބު އަދަދުތައް ބޭނުންކޮށްގެން ހަދާފައިވާ ހިސާބުތަކުން ދައްކާ ގޮތުންވެސް ގިނަވެގެން 7000 ރުފިޔާ އިން 15 އަހަރު ތެރޭގައި ޙަރަދު އަނބުރާ ލިބި ފައިދާވެސް އެޗްޑީސީއަށް ލިބޭނެކަމަށް ޑރ. މުއިއްޒު ވަނީ ވިދާޅުވެފައެވެ.

ޑރ. މުއިއްޒުވަނީ ފްލެޓްގެ ތަފްސީލްތައް ހިއްސާކުރައްވާފައެވެ.

ޑރ މުއިއްޒު ވިދާޅުވިގޮތުގައި ކުލީގެ ގޮތުގައި 5،600 ރުފިޔާ ނެގުމަށް ރައީސް ޔާމީން ނިންމަވާފައިވަނީ ރަސްމީކޮށް ލިޔެކިޔުންތަކުންކަން ފާހަގަކުރައްވައި އެކަމަކީ އެޗްޑީސީއާއި ހައުސިންގ މިނިސްޓްރީއަށް އެނގިވަޑައިގަންނަވާނެކަމަށެވެ.

ހިޔާ ފްލެޓްގެ މަސައްކަތާ ގުޅޭގޮތުން މީޑިއާއަށް މައުލޫމާތު ދިނުމަށް މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެޗްޑީސީގެ ޑެޕިއުޓީ އެމްޑީ އަހުމަދު އާތިފް ވިދާޅުވީ ޑިޒައިނަށް ގެނައި ބަދަލުތަކާއެކު ހިޔާ މަޝްރޫއުގެ ޖުމްލަ އަގު 434 މިލިއަން ޑޮލަރަށް އަރާފައިވާ ކަމަށާއި ޔުނިޓެއްގެ އަގު 82،000 އެމެރިކާ ޑޮލަރު (ގާތްގަނޑަކަށް 1.2 މިލިއަން ރުފިޔާ) އަށް އަރާނެ ކަމަށާއި ފްލެޓަކަށް ކޮންމެ މަހަކު 11،000 ރުފިޔާ ދައްކަން ޖެހޭނެ ކަމަށް އާތިފް ވިދާޅުވި އެވެ.

ސުހައިލު ވިދާޅުވީ މިހާރު ހުރިހާ ހަރަދުތަކެއް ހިމެނިގެން މި ކޮންޓްރެކްޓް ނިމޭއިރު ޔުނިޓަކަށް ގާތްގަނޑަކަށް 1.2 މިލިއަން ރުފިޔާ އަރާ ކަމަށެވެ. މި ޕްރޮޖެކްޓަކީ ފައިނޭންސް ކުރުމަށް 100 ޕަސަންޓު ދަރަނީގެ ގޮތުގައި ނެގޭ ޕްރޮޖެކްޓެއް ކަމަށް ވިދާޅުވިއެވެ.

ހިޔާ މަޝްރޫއުގެ ދަށުން ފްލެޓް އިމާރާތް ކުރުމުގެ މަސައްކަތް ކުރުމަށް އެޗްޑީސީއިން ޗައިނާގެ ސީސީސީއާ ހަވާލުކުރީ 20 ޖުލައި 2016 ގަ އެވެ. އެ މަޝްރޫއުގެ އަމަލީ ގޮތުން އެ މަސައްކަތް ފެށީ 20 ޑިސެމްބަރު 2017 ގަ އެވެ.