ރަސްމީ ތިން ދުވަސް ބަންދުކުރުމަކީ ޒިންމާދާރު ގޮތެއް ނޫން: ރައީސް
ލިޔުންތެރިޔާ
އަހުމަދު ހަމީދު އާދަމް
މި އަހަރުގެ އަލްހާ އީދުގެ ބަންދަށް ފަހު އެ ހަފްތާގެ ރަސްމީ ތިން ދުވަސް ބަންދު ނުކުރީ އެއީ ޒިންމާދާރު ގޮތެއް ކަމަށް ފެނިވަޑައިނުގަންނަވާތީ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
މި އަހަރުގެ އަލްހާ އީދު ދުވަހަކީ ޖޫން މަހުގެ ހައެއްވާ ހުކުރު ދުވަހެވެ. އީދު ބަންދުގެ ގޮތުގައި ކަނޑައަޅާފައި ވަނީ ހުކުރުން ފެށިގެން ހޯމަ ދުވަހުގެ ނިޔަލަށެވެ. ނަމަވެސް އީދުގެ ބަންދަށް އެ ހަފްތާގެ ރަސްމީ ތިން ދުވަސް އިތުރުކޮށްދޭނެ ކަމަށް ބައެއް މީހުން ތިބީ އުންމީދު ކޮށްގެންނެވެ.
ސަރުކާރުން ވަނީ އީދު ބަންދުގެ ގޮތުގައި ކަނޑައަޅާފައިވާ މުއްދަތު ދިގު ނުކުރަން ނިންމާފަ އެވެ. އެ ނިންމުމާއި ގުޅޭގޮތުން "ރައްޔިތުންނާއެކު" ޕޮޑްކާސްޓްގައި ވާހަކަ ދައްކަވަމުން ރައީސް ވިދާޅުވީ ތިން ދުވަސް ބަންދު ކުރުމަކީ ޒިންމާދާރު ގޮތެއް ނޫން ކަަމަށެވެ.
މީގެ ކުރީން ބައެއް ފަހަރު އެއް ދުވަސް ނުވަތަ ދެ ދުވަސް ބަންދުކޮށްފައިވާ ކަމަށާ ނަމަވެސް ތިން ދުވަސް ބަންދު ކުރުމަކީ ރަނގަޅު ކަމެއް ކަމަށް ގަބޫލު ނުކުރެއްވޭ ކަމަށް ރައީސް ވިދާޅުވި އެވެ.
"ތިން ދުވަސްވީމަ ބަންދެއް ނުކުރަން. ވަރަށް ގިނަ މީހުން އުންމީދު ކުރާކަށް އަޅުގަނޑަށް ވެސް އެނގޭ. އެކަމަކު ވެސް ތިން ދުވަސް ބަންދު ކުރުމަކީ ރަނގަޅު ކަމެއް ކަމަކަށް ގަބޫލެއް ނުކުރެވޭ އިނގޭތޯ," ރައީސް ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
