އެސްއޭޕީ: ދައުރު ނިމުމުގެ ކުރިން ފަތުރުވެރިކަމުގެ ސިނާއަތަށް 35000 އެނދު އިތުރުކުރަނީ

ސަރުކާރުގެ މިދައުރު ނިމުމުގެ ކުރިން ފަތުރުވެރިކަމުގެ ސިނާއަތަށް 35000 އެނދު އިތުރުކުރުމަށް ނިންމައިފިއެވެ.

މިކަން ވަނީ ރޭ އިއުލާންކުރެވުނު ކުރިއަށް އޮތް ފަސް އަހަރުގެ ސްޓްރެޓަޖިކް އެކްޝަން ޕްލޭންގައި ހިމެނިފައެވެ. އެ ޕްލޭންގައި ވަނީ ފަތުރުވެރިކަމުގެ ދާއިރާގެ ކުރިއެރުމަށް ކުރާނެ ގިނަ ކަންތައްތަކެއް ހިމަނާފައެވެ.

މި ޕްލޭންގައި ބުނެފައިވަނީ މަތީ ފަންތީގެ ފަތުރުވެރިންގެ މެދުގައި ރާއްޖެއަށް އޮތް މަގުބޫލުކަން ހިފަހައްްޓައި، އާ މާކެޓްތައް ތައާރަފްކުރާނެކަމަށެވެ. އެގޮތުން ކޮންފަރެންސާއި ކުޅިވަރު އަދި އެޑްވެންޗާ ފަތުރުވެރިކަން ވަނީ ފާހަގަކޮށްފައެވެ. އަދި ޓޫރިސްޓް ހިދުމަތްދޭ ތަންތަން ހިންގާ ފަރާތްތަކާއި މުޖުތަމައުއާއި އެކު އޮތް ގުޅުންތައް ބަދަހިކޮށް، ފަތުރުވެރިކަމުގެ ވިޔަފާރީގެ ނަފާ މިހާރަށްވުރެ ބޮޑަށް އާންމު ރައްޔިތުންނަށް ހޯދައިދިނުން ވަނީ ހިމަނާފައެވެ.

މީގެ އިތުރުން ފަތުރުވެރިކަމުގެ ދާއިރާގައި ހަރަކާތްތެރިވާ ދިވެހިންނާއި ވަކިން ޚާއްސަކޮށް ޒުވާނުން އިތުރުކުރުމަށް ސަރުކާރުން ވަނީ އަމާޒުހިފާފައެވެ.

ރޭ އާންމުކުރި ސްޓްރެޓަޖިކް އެކްޝަން ޕްލޭންގައިވާ ގޮތުގައި 2023 ވަނަ އަހަރު ވާންވާއިރަށް ފަތުރުވެރިކަމުގެ ސިނާއަތަށް މުޅިން އާ 35000އެނދު އިތުރުކުރުމަށް ވަނީ ހަމަޖެހިފައެވެ. އަދި ގެސްޓްހައުސް ވިޔަފާރި ކުރާ ރަށްރަށުގެ ތެރެއިން މަދުވެގެން 50 އިންސައްތަ ރަށުގައި ރަށު ވެބްސައިޓެއް ގާއިމްކޮށް، ޓޫރިޒަމް ޓްރޭނިންގ ފަންޑުން މަދުވެގެން 30،000މީހުން ތަމްރީންކުރެވިފައިވުން ވަނީ އަމާޒުކޮށްފައެވެ.