ޑްރޯންތަކާއި އެކު ދިވެހި ސިފައިން ރައްކާތެރިކަމާއެކު ތިބެގެން ރައްޔިތުންނަށް ދޭންޖެހޭ ޚިދުމަތްތައް ދެވޭނެ: ވަޒީރު ޣައްސާން
ޑްރޯންތަކާއި އެކު ދިވެހި ސިފައިން ރައްކާތެރިކަމާއެކު ތިބެގެން ރައްޔިތުންނަށް ދޭންޖެހޭ ޚިދުމަތްތައް ދެވޭނެ ކަމަށް ދިވެހިރާއްޖޭގެ ދިފާއީ ވަޒީރު މުހައްމަދު ޣައްސާން މައުމޫން ވިދާޅުވެއްޖެއެވެ.
އެޑްވާންސް ޑްރޯންއާއި ދިވެހި އެއާ ފޯސް އިފްތިހާހު ކުރުމަށް ރޭގައި ބޭއްވި ރަސްމިއްޔާތުގައި ވާހަކަދައްކަވަމުން ވަޒީރު ޣައްސާން ވިދާޅުވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ބެއްލެވުމުގެ ދަށުން ޤާއިމުކުރެވުނު ނިޒާމާއެކު ރާއްޖޭގެ ކަނޑުގެ ސަރަހައްދު ބެލެހެއްޓުމާއި ޤައުމުގެ މިނިވަންކަން ދިފާއުކުރުމަށް މަސައްކަތްކުރާނީ ސީދާ ރާއްޖޭގެ ދިފާޢީ ބާރުންކަމަށެވެ.
މިއަދު އަސްކަރިއްޔާ އަށް ރައީސް ޑރ.މުއިއްޒުގެ ބުރަ މަސައްކަތްޕުޅުން ހޯއްދަވައިދެއްވި މި ޑްރޯންތަކަކީ ދުނިޔޭގައި މިހާރު ކުރިއަރާފައިހުރި ޤައުމުތަކުގައި ބޭނުންކުރާ ސޮފިސްޓިކޭޓޭޑް ޓެކްނޮލޮޖީގެ ޕްލެޓްފޯމެއް ކަމަށާއި މިއީ ސާވޭލަންސާއި ސާޗް އެންޑް ރެސްކިއުއަށް ފޯކަސްކުރާ އިރެއްގައި ވިޔަސް ދިމާވާ ހާލަތަކުން ރާއްޖޭގެ މިނިވަންކަން ދިފާއު ކުރަން ޑިފެންސިވް މެނޫވާސް ނެގޭނެ އަލިފާނުގެ ބާރުހުރި ހަތިޔާރެއްކަމަށް ވަޒީރު ޣައްސާން ވިދާޅުވިއެވެ.
"މިއަދު އަސްކަރިއްޔާއަށް، ކޮމަންޑަރ އިންޗީފްގެ އިސްނެންގެވުމަށް ކުރެއްވި ބުރަ މަސައްކަތުން މިހޯއްދަވާދެއްވީ މިފަދަ ވަޞީލަތެއް. ދިވެހި ސިފައިން ރައްކާތެރިކަމާއެކު ތިބެގެން ރައްޔިތުންނަށް ދޭންޖެހޭ ޚިދުމަތްތައް ދެވޭނެ ނިޒާމެއް. ދުނިޔެގަ މިހާރު ކުރިއަރާފައިހުރި ޤައުމުތަކުގައި ބޭނުންކުރާ ސޮފިސްޓިކޭޓޭޑް ޓެކްނޮލޮޖީގެ ޕްލެޓްފޯމެއް."
ވަޒީރު ޣައްސާން ވިދާޅުވިއެވެ.
ޣައްސާން ވިދާޅުވީ ޑްރޯން ގެ އިތުރުންވެސް ރޭގައި ތައާރަފްކުރެވިގެން ދިޔަ އެއަރ ކޯގެ ހިދުމަތަކީ ދިވެހި ޤައުމަށާއި ދިވެހި އަސްކަރިއްޔާއަށްވެސް ތާރީޚީ މަސައްކަތެއްކަމަށާއި މިއީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ބުރަ މަސައްކަތުން ގެނެވުނު ތާރީޚީ ދުވަހެއްކަމަށެވެ.
މިއަދު ހަނގުރާމަ ކުރެވޭގޮތް ބަދަލުވެއްޖެކަމަށާއި އެއްޤައުމުން އަނެއް ޤައުމު އަޅުވެތިކުރުން ނިމުމަކަށް އައިސްފައިވީނަމަވެސް އެއްޤައުމުން އަނެއް ޤައުމުގެ އިސްތިޤުލާލަށް ބާރުފޯރުވަމުންދާ މަންޒަރު ފެންނަކަން ފާހަގަކުރައްވާ ޣައްސާން ވަނީ ރާއްޖެއިން އެފަދަ ފުރުސަތެއް އެއްވެސް ފަރާތަކަށް ނުދޭނެކަމަށް ވެސް ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
