މައްކާއިން މަދީނާއަށް ދަތުރުކުރާ ޢުމްރާވެރިން 8 ގަޑިއިރު ހޭދަކުރުން ނިމުމަކަށް

މައްކާއިން މަދީނާއަށް ދަތުރުކުރާ ދިވެހި ޢުމްރާވެރިން 8 ގަޑިއިރު ހޭދަކުރުން ނިމުމަކަށް ގެނެސް 2 ގަޑިއިރުން ދަތުރުކުރެވޭނެ އިންތިޒާމު ހަމަޖައްސައިފިއެވެ.

މިއަދާ ހިސާބަށް ޢުމްރާއަށް ގޮސްއުޅޭ ދަތުރުވެރިން މައްކާއިން މަދީނާއަށް އާއްމުގޮތެއްގައި ދަތުރުކުރުމަށް ބޭނުންކުރަނީ ބަހެވެ. ބަހުގައި ދަތުރުކުރުމަށް 06 ގަޑިއިރާއި 08 ގަޑިއިރުގެ ދިގު ވަގުތުތަކެއް ހޭދަކުރަން ޖެހެއެވެ.

ދަތުރުގެ ދިގުމިނުގެ ސަބަބުންނާއި ޢުމުރުން ދުވަސްވުމުގެ ސަބަބުން އަދި އެނޫންވެސް ސިއްޙީ މައްސަލަތައް ހުންނަ ފަރާތްތަކަށް ގިނަ އިރު އިށީނދެގެން އިންނަންޖެހުމުގެ ސަބަބުން އިޙްސާސް ކުރަންޖެހޭ ތަކުލީފުތައް މިކަމުގެ ސަބަބުން ވަނީ ވަރަށް ބޮޑުވެފައެވެ.

މޯލްޑިވްސް ހައްޖު ކޯޕަރޭޝަނުން މިކަމަށް ވަނީޙައްލެއް ގެނެސްދީފައެވެ. ބަހުގައި ދަތުރުކުރާ ކުރުން ނިމުމަކަށް އައިސް ހައި ސްޕީޑް ރޭލުގައި 2 ގަޑިއިރުން ދަތުރުކުރެވޭނެ އިންތިޒާމު މިއަދު ވަނީ ހަމަޖައްސާފައެވެ.

އެގޮތުން، ޙައްޖު ކޯޕަރޭޝަންގެ ޙަވާލުގައި ރަމަޟާން ޢުމްރާ އަށް ދަތުރުކުރި ޢުމްރާވެރިން ރޭލުގައި މައްކާ އިން މަދީނާ އަށް މިއަދު ވަނީ ގެންގޮސްފަ އެވެ.

ޙައްޖު ކޯޕަރޭޝަނުން ޙައްޖު އަދި ޢުމްރާގެ ޚިދުމަތް ދެމުން އަންނަތާ 10 އަހަރު ފަހުން ޢުމްރާވެރިން ރޭލުގަ މަދީނާ އަށް ގޮސްފައި މިވަނީ އަދި އަލަށެވެ.

ފެންވަރު ރަނގަޅު ޚިދުމަތްތަކަކާއި އެކު ޢުމްރާވެރިން މިއަދު މަދީނާ އަށް ދަތުރުކޮށްފައިވަނީ ލުއިފަސޭހަ ކަމާއި އެކު ހިތްހަމެޖެހުމާއި އުފަލުގަ އެވެ.

ޙައްޖު ކޯޕަރޭޝަންގެ ޙަވާލުގަ މިއަހަރުގެ ރަމަޟާން ޢުމްރާ އަށް ދަތުރުކުރި ޖުމްލަ 253 ޢުމްރާވެރިންވަނީ މިއަދު ރޭލުގައި މަދީނާ އަށް ދަތުރުކޮށްފަ އެވެ.

އަދި އެފަރާތްތަކުގެ ތެރޭގައި ކުރިން މަދީނާ ދަތުރު ތަޖްރިބާ ކޮށްފައިވާ ފަރާތްތައް ވެސް ތިބުމާއި އެކު، އެފަރާތްތަކުން ރޭލު ދަތުރު ފާހަގަ ކުރަނީ ވަރަށްވެސް ލުއިފަސޭހަ ދަތުރެއްގެ ގޮތުގަ އެވެ.

އަދި ރަމަޟާން މަހުގަ މިފަދަ ޚިދުމަތެއް މޯލްޑިވްސް ޙައްޖު ކޯޕަރޭޝަންގެ ފަރާތުން ފޯރުކޮށްދެއްވި ކަމަށްޓަކައި އެކަން އުފަލާއި އެކު ފާހަގަ ކޮށް ބަލައިގަންނަކަން އެފަރާތްތަކުން ފާހަގަ ކުރެއްވި އެވެ.

މޯލްޑިވްސް ޙައްޖު ކޯޕަރޭޝަނުން މައުލޫމާތުދެއްވާ ގޮތުގައި ކުރިއަށް އޮތްތާނގަ އެކުންފުނިން ދަތުރުކުރާ ހުރިހާ ޢުމްރާވެރިން ވެސް މަދީނާ އަށް ދަތުރުކަރާނީ އަދި އެބުރި އަންނާނީ މުޅިންވެސް ރޭލުގައެވެ.

މިއީ ތާރީޚީ ޚިދުމަތެކެވެ.