ފުލުހުން އަނިޔާކުރި މައްސަލައިގެ މައުލޫމާތު 48 ގަޑިއިރު ތެރޭގައި ކޮމެޓީއަށް ދޭން ނިންމައިފި

މިދިޔަ ހުކުރު ދުވަހުގެރޭ ފުލުހުން ހިންގި އޮޕަރޭޝަނެއްގައި މާލޭގެ ގެއަކަށްވަދެ މީހަކަށް އަނިޔާކުރި މައްސަލައިގެ މައުލޫމާތު ކަމާ ބެހޭ ފަރާތްތަކުން 48 ގަޑިއިރުގެ ތެރޭގައި ރައްޔިތުންގެ މަޖިލީހުގެ ހިއުމަން ރައިޓްސް ކޮމިޓީއަށް ދިނުމަށް އެކޮމެޓީން މިއަދު ފާސްކޮށްފިއެވެ.

މިއަދު ހަވީރު ބޭއްވި ކޮމެޓީ ބައްދަލުވުމުގައި، ފުލުހުން އަނިޔާކުރި މައްސަލައިގައި ނެޝަނަލް އިންޓަގްރިޓީ ކޮމިޝަނާއި ފުލުހުންގެ ޕްރޮފެޝަނަލް ސްޓޭންޑާޑް ކޮމާންޑްސް، އަދި އެޗްއާރުސީއެމުން އަޅާފައިވާ ފިޔަވަޅުތަކުގެ މައުލޫމާތު ދޭން އެ މުއައްސަސާތަކަށް 48 ގަޑިއިރު ދިނުމަށް ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އިއްތިފާގުން ވަނީ ފާސްކޮށްފައެވެ.

އަދި އެމައުލޫމާތުތައް 48 ގަޑިއިރުގެ ތެރޭގައި ލިޔުން ކޮމެޓީއަށް ހުށަހެޅުމަށް ނިންމުމުގެ އިތުރުން އެއިސާރާތަކުގެ އިސްވެރިންނާ ބައްދަލުކުރުމަށް ވެސް ކޮމެޓީން ފާސްކުރިއެވެ.

މި ހުށަހެޅުން ހުށަހެޅުއްވީ ދަނގެތި ދާއިރާގެ މެމްބަރު އަދި ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމެވެ. ނާޒިމް ހުށަހަޅުއްވާފައިވަނީ، ފުލުހުން އަނިޔާކުރާ ސަބަބުތައް ދެނެގަނެ، އެކަން ހުއްޓުވުމަށް ކަމާ ބެހޭ މުއައްސަސާތަކާ އެކު ކޮމިޓީން މަސައްކަތް ކުރުމަށެވެ.

މިއަދުގެ ބައްދަލުވުމުގައި ފުލުހުން އެމީހާއަށް އަނިޔާކުރާ މަންޒަރު ފެންނަ ވީޑިއޯ ދައްކާފައިވެއެވެ. އެއަށްފަހު ވާހަކަދައްކަވަމުން މެންބަރު ނާޒިމް ވިދާޅުވީ ފުލުހުންނަކީ ރައްޔިތުންގެ ހިމާޔަތުގައި ތިބޭ ބަޔަކަށް ވާއިރު ފުލުހުންގެ ފަރާތުން އަނިޔާތަކެއް ލިބެމުން ދިއުމަކީ ބަލައިގަނެވޭނެ ކަމެއް ނޫން ކަމަށެވެ. އަދި މިހާރުގެ ސަރުކާރު ވެރިކަމަށް ގެނައީ ފުލުހުން ކުރިން ކޮށްފައި ހުރި ލާއިންސާނީ ކަންތައްތައް ބަލަން ކަމަށާއި އެހެން ނަމަވެސް މިކަންތައް ރަނގަޅަށް ބެލިދާނެ ކަމަށް ގަބޫލު ނުކުރައްވާކަމަށް ނާޒިމް ވިދާޅުވިއެވެ.

މިއަދުގެ ބައްދަލުވުމުގައި ހުރިހާ މެންބަރުން ވެސް ވަނީ ފުލުހުންގެ އަމަލުތައް ވަރަށް ބޮޑަށް ކުށްވެރިކުރައްވައި ވާހަކަދައްކަވާފައެވެ.