މަސްމާރުކޭޓު އިމާރާތުގައި ޤަވާއިދާ ހިލާފަށް ހިންގާ ވިޔަފާރިތައް ހުއްޓުވަން މާލެސިޓީ ކައުންސިލުން ނިކުމެއްޖެ

މާލޭ މަސްމާރުކޭޓް އިމާރާތުގައި ޤަވާއިދާ ހިލާފަށް ވިޔަފާރިކުރަމުންގެންދާކަން ފާހަގަ ކުރެވިފައިވާކަމަށް މާލެ ސިޓީ ކައުންސިލުން ބުނެފިއެވެ.

މާލެސިޓީ ކައުންސިލުން މިއަދު ބުނެފައިވަނީ، ރޯމަސްމާރުކޭޓުގެ ފުރަތަމަ ފަންގި ފިލާއާއި ދެވަނަ ފަންގިފިލާގައި އެއްވެސް އެއްބަސްވުމެއް ނެތި ޤަވާޢިދާ ޚިލާފަށް ވިޔަފާރިތައް ކުރަމުންގެންދާކަމަށެވެ. އެގޮތުން މާރުކޭޓުގެ ތެރޭގައި ހިންގަމުންދާ ބައެއް ފިހާރަތަކާއި ގުދަންތަކާއި އެހެނިހެން ބޭނުމަށް ބޭނުން ކުރަމުންދާ ތަންތަން ހުރިކަން ފާހަގަކުރެވިފައިވާކަމަށް ސިޓީ ކައުންސިލުން މިއަދު ނެރުނު އާއްމު ބަޔާނެއްގައި ވަނީ ބުނެފައެވެ.

މާލެސިޓީ ކައުންސިލުން ވަނީ މާރުކޭޓް އިމާރާތުގެ ތެރޭގައި އުސޫލާ ހިލާފަށް ވިޔަފާރިކުރާކަން ފާހަގަވި ތަންތަނަށް ނޯޓިސް ދީ، އެތަންތަން ހިންގަމުންދަނީ އެއްބަސްވުމެއްގެ ދަށުން ކަމަށްވާނަމަ އެކަން 7 ދުވަހުގެ ތެރޭގައި ކައުންސިލާ ހިއްސާކުރަން އެދިފައެވެ. އަދި ކަނޑައެޅިފައިވާ މުއްދަތުގައި އެކަމަށް އިޖާބަ ނުދީފިނަމައެތަންތަން ސާފްކުރުމުގެ މަސައްކަތް ފަށައި އެތަންތަނުގައި ހުންނަ ތަކެތި ކުނީގެ ގޮތުގައި ނައްތާލާނޭކަމަށް ސިޓީ ކައުންސިލުން ވަނީ ބުނެފައެވެ.

މަސްމާރުކޭޓު އިމާރާތުގައި ގަވާއިދާ ހިލާފަށް ވިޔަފާރިކުރާކަމަށް ސިޓީ ކައުންސިލުން ބުނެފައިވާއިރު، އެ އިމާރާތުގެ މަތީ ފަންގިފިލާގައި އިމްޕޯތްމުދާ ވިއްކަމުންދާކަން ފާހަގަކޮށްލެވެއެވެ. ނަމަވެސް އެތަނުން އެއްވެސް ތަނެއްގައި ސިޓީކައުންސިލުގެ އެއްވެސް ކަހަލަ ލިޔުމެއް ހިއްޕާފައި ނުވާކަން ފާހަގަކޮށްލެވެއެވެ.

މާލޭ މަސްމާރުކޭޓް ދެވަނަ ފަންގިފިލާގައި ބައެއް ފަރާތްތަކުން ގަވާއިދާ ހިލާފަށް ވިޔަފާރިކުރުމާއި، ވިޔަފާރި އުސޫލުން ބޭރު މީހުން ނިންދަވާ ތަންތަން ހަދައި ވިޔަފާރި ކުރަމުންދާތީވެ، ސިޓީކައުންސިލުން 2021 ވަނަ އަހަރު ވަނީ އެތަންތަން ހުސްކުރަން އަންގާފައެވެ.

މާލޭ މަސްމާރުކޭޓުގައި ޤަވާއިދާ ހިލާފަށް ވިޔަފާރި ހިންގަމުން އަންނަކަން ސިޓީކައުންސިލުން ފާހަގަކޮށްފައިވައިރު، އެތަން ތަރައްޤީކުރުމަށް ދެ އެއްބަސްވުމެއް ހަދާފައި އޮތް މައްސަލައެއް ވަނީ ފެންމަތިވެފައެވެ. ނަމަވެސް އެ އެއްބަސްވުންތަކުގެ ސައްހަކަމާމެދު މާލެސިޓީ ކައުންސިލްގެ ވެރިންގެ މެދުގައި ހިޔާލުތަފާތުވެފައިވާކަން ފާހަގަކޮށްލެވެއެވެ.