36 ރަށެއްގައި ފުލުހުންގެ މަރުކަޒު ގާއިމްކޮށްދޭނެ ފަރާތެއް ހޯދަނީ

ރާއްޖޭގެ 36 ރަށެއްގައި ފުލުހުންގެ މަރުކަޒު ގާއިމްކޮށްދޭނެ ފަރާތެއް ހޯދުމަށް ފުލުހުންގެ ޚިދުމަތުން އިއުލާނުކޮށްފިއެވެ.

މި މަޝްރޫއަކީ ރާއްޖޭގެ އެކި ކަންކޮޅުތަކުގައި ފުލުހުންގެ ޚިދުމަތް ފުޅާކޮށް، ރާއްޖޭގައި ކުށްކުރުން މަދުކުރުމަށް ސަރުކާރުން ކުރިއަށްގެންދާ މަސައްކަތުގެ ތެރެއިން ހިންގާ މަޝްރޫއެކެވެ.

ފުލުހުންގެ އިދާރާއިން ނެރުނު އިއުލާނުގައި ވާ ގޮތުން، މި މަޝްރޫއުގެ ދަށުން އިމާރާތްކުރާ ތަންތަން އަޅަންވާނީ ފުލުހުންގެ އިދާރާއިން ދޭ މައުލޫމާތާ އެއްގޮތަށެވެ. މި މަސައްކަތަށް ޝައުގުވެރިވާ ފަރާތްތަކަށް ރަޖިސްޓްރީވުމުގެ ފުރުސަތު ހުޅުވާލާފައިވާ ކަމަށް އިއުލާނުގައި ބުންޏެވެ.

މި މަޝްރޫއުގައި ބައިވެރިވުމަށް ޝައުގުވެރިވާ ފަރާތްތަކުން ރަޖިސްޓްރީވުމަށް ދެވިފައިވަނީ މި މަހުގެ 20 ވަނަ ދުވަހުގެ މެންދުރު 12:00 އާ ހަމައަށެވެ. ރަޖިސްޓްރީވުމަށްފަހު، ޕްރޮޕޯސަލް ހުށަހެޅުމަށް ބޭނުންވާ މައުލޫމާތު އީމެއިލް މެދުވެރިކޮށް ފޮނުވާނެ ކަމަށް އެ އިއުލާނުގައި ބުންޏެވެ.

މިއީ ސަރުކާރުން މަސްތުވާތަކެއްޗާއި ގޭންގު މާރާމާރީގެ މައްސަލަތަކަށް ހައްލު ހޯދުމަށް ކުރަމުންދާ މަސައްކަތުގެ ތެރެއިން ކުރިއަށްގެންދާ މުހިންމު މަޝްރޫއެކެވެ. މަޝްރޫއު ފުރިހަމަވުމުން ރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުންނަށް ފުލުހުންގެ ޚިދުމަތް ފަސޭހަކަމާއެކު ލިބޭނޭކަމަށް ފުލުހުން ބުނެއެވެ.