ލޯން އެހީގައި ޕީއެޗްޑީއަށް ކިޔެވުމުގެ ފުރުސަތު ހުޅުވާލައިފި

ސަރުކާރުގެ ލޯން އެހީގައި ޕީއެޗްޑީއަށް ކިޔެވުމުގެ ފުރުސަތު ހުޅުވާލައިފިއެވެ.

މިނިސްޓްރީ އޮފް ހަޔާ އެޑިއުކޭޝަންގެ ފަރާތުން މިއަދު އިފްތިތާހު ކުރި މި ސްޓޫޑެންޓް ލޯން އިފްތިތާހު ކުރުމަށް ނޫސްވެރިންނާއި ބައްދަލުކުރައްވާ ވާހަކަ ދައްކަވަމުން މިނިސްޓަރ ޑރ.އިބްރާހީމް ހަސަން ވިދާޅުވީ ކޮންމެ ކުއްޖަކުވެސް މަތީ ތައުލީމް ހާސިލް ކުރަން ބޭނުންވާ ކޮންމެ ދާއިރާއަކުން މަތީ ތައުލީމު ހާސިލް ކުރުމަށް މި ސްކީމްގެ ދަށުން ލޯން ހަމަޖެހިގެންދާނެކަމަށެވެ.

ނަމަވެސް ލޯން ސްކީމްގެ ދަށުން ރާއްޖެއިން ބޭރުން ކިޔެވުމަށް ފުރުސަތު ދޭނީ ރާއްޖެއިން ކިޔެވެން ނެތް ދާއިރާތަކަށް ކަމަށް މިނިސްޓަރ ފާހަގަކުރެއްވިއެވެ.

މިނިސްޓަރގެ ވާހަކަފުޅުގައި ވަނީ ރާއްޖެއަށް މުހިންމު ދާއިރާތަކުން ޕީއެޗްޑީ ހެދުމަށް ޚާއްސަ ޖާގަތަކެއް ކަނޑައެޅިފައިވާކަން ހާމަކުރައްވާފައެވެ. އެގޮތުން ސައިކޮލޮޖީ، އޮކިއުޕޭޝަނަލް ތެރަޕީ، ސްޕެޝަލް އެޑިއުކޭޝަން، ސްޕީޗް ތެރަޕީ، ސްޕޯޓްސް މެނޭޖްމަންޓް، ރެނިއުބަލް ގްރީން އެނާޖީ އަދި ކަލްޗާ އެންޑް ހެރިޓޭޖްގެ ދާއިރާތަކުން ކިޔަވަން ބޭނުންވާ ފަރާތްތަކަށް ލޯން ސްކީމް ގެ ދަށުން ވަކި ސްލޮޓް ތަކެއް ކަށަވަރު ކޮށްދިނުމަށް ބޭނުންވާ ކަމަށް މިނިސްޓަރ ވަނީ ވިދާޅުވެފައެވެ.

ފާހަގަކޮށްލެވޭ ގޮތުގައި މިހާރުވެސް ރާއްޖެއިން ބޭރުގައި ކިޔަވަމުންދާ ދަރިވަރުންނަށް އެ ދަރިވަރުންގެ ކިޔެވުން ފުރިހަމަ ކުރުމަށްޓަކައި ވެސް ލޯން ސްކީމްގެ ދަށުން ފުރުސަތު ދޭން މިނިސްޓްރީން ވަނީ ނިންމާފައެވެ. އެގޮތުން އެފަދަ ދަރިވަރުންގެ ކޯހުގެ %50 ފުރިހަމަވެފައި ނެތް ނަމަވެސް ލޯން ލިބޭނެކަމަށް މިނިސްޓަރ ހަސަން ވިދާޅުވިއެވެ.