15 މާޗުގެ ކުރިން އިންޑިޔާ ސިފައިން ބާލަން އެދިއްޖެ!

މި އަހަރުގެ މާރިޗު 15 ވަނަ ދުވަހުގެ ކުރީން، ރާއްޖޭގައި ގާއިމްވެތިބި އިންޑިޔާ ސިފައިން ރާއްޖެއިން ބޭލުމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު އެދިވަޑައިގެންފިއެވެ.

މިއަދު ރައީސް އޮފީހުން ބޭއްވި ނޫސްވެރިންގެ ބައްދަލުމުގައި، ރާއްޖޭގައި ތިބި އިންޑިޔާ ސިފައިން ފޮނުވާލުމާއި ގުޅޭ އެންމެ ފަހުގެ އަދާހަމަ ހާމަކުރައްވަމުން، ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުالله ނާޡިމް އިބްރާހީމް ވިދާޅުވީ ރާއްޖޭގައި ތިބި އިންޑިއާ ސިފައިން ބޭލުމުގެ މަސައްކަތް، ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވެރިކަމާއި ހަވާލުވެވަޑައިގެންނެވި ފުރަތަމަ ދުވަހުން ފެށިގެން ފަށްޓަވާފައިވާ ކަމަށެވެ.

އެގޮތުން މިހާތަނަށް އެކަމާއި ގުޅޭ 11 ބައްދަލުވުމެއް އިންޑިޔާ އާއި އެކު ބާއްވާފައިވާއިރު، މިއަދު ހެނދުނުން ފެށިގެންވެސް އެކަމާއި ގުޅޭ ބައްދަލުވުމެއް ބާއްވާފައިވާ ކަމަށް އެނާ ވިދާޅުވި އެވެ.

12 ވަނަ ބައްދަލުވުން، މިއަދު ހެނދުނުން ފެށިގެން ފޮރިން މިނިސްޓްރީގައި އެބަ ކުރިއަށްދޭ. މިބައްދަލުވުމަށް، ރައީސުލްޖުމުހޫރިއްޔާ ވަނީ 15 މާރިޗުގެ ކުރިން އިންޑިޔާ ސިފައިން މިގައުމުން ބާލައި، ނިންމުމަށް ހުށަހަޅުއްވާފައި. ރައީސުލްޖުމްހޫރިއްޔާ ޚާއްސަކޮށްވަނީ މި ބައްދަލުވުމުގެ އެޖެންޑާއަށް މި ދެންނެވި ތާރީޚް ހުށަހަޅުއްވާފަ. އެ މަޝްވަރާތައް މިހާރު މިއަދުގެ ބައްދަލުވުމުގައި އެ ކުރިއަށްދަނީ.

ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުالله ނާޡިމް އިބްރާހީމް

އިންޑިޔާއާ އެކު މިހާރު ކުރިއަށްދާ ބައްދަލުވުމުގައި އިންޑިޔާ ސަފީރާއި ޖޮއިންޓް ސެކެރެޓަރީ ގެ އިތުރުން އިސްފަރާތްތައް ބައިވެރިވާ ކަމަށާ، ރާއްޖޭގެ ފަރާތުންވެސް ފޮރިން މިނިސްޓްރީ އާއި ރައީސް އޮފީހުގެ އިސް އޮފިޝަލުން ބައިވެރިވެވަޑައިގަންނަވާ ކަމަށް ނާޒިމް ވިދާޅުވި އެވެ.

ރާއްޖޭގައި ތިބި އިންޑިއާ ސިފައިން ބޭލުމަކީ ރައީސުލްޖުމްހޫރިއްޔާ ޑރ މުހައްމަދު މުޢިއްޒު ގެ އެންމެ މުހިންމު ވަޢުދު އެއް ކަމަށްވާއިރު، އެކަން ކުރުމަށް ހަފްތާ 14 ގެ މަގުޗާޓުގައިވެސް ހިމަނާފައިވެއެވެ.