ޕީއެންސީގެ ވަގުތީ ރައީސްއަަކަށް އަދުރޭ!

ޕީޕަލްސް ނޭޝަނަލް ކޮންގްރެސްގެ ވަގުތީ ރައީސްއަކަށް ރައްޔިތުންގެ މަޖިލީހުގެ ފޮނަދޫ ދާއިރާގެ މެންބަރ އަބްދުއްރަހީމް އަބްދުﷲ އިންތިޚާބުކޮށްފިއެވެ.

މި މަގާމަށް އަދުރޭ އިންތިޚާބުކޮށްފައިވަނީ ދަރުބާރުގޭގައި މިހާރު ކުރިއަށްދާ ޕީއެންސީގެ އިފްތިތާހީ ޖަލްސާގައެވެ.

އަބްދުއްރަހީމް ޕާޓީގެ ވަގުތީ ރައީސްކަމުގެ މަގާމަށް ހަމަޖެއްސިއިރު، އެޕާޓީއަށް ވަނީ ދެ ވަގުތީ ނައިބު ރައީސުންވެސް އިންތިޚާބުކޮށްފައެވެ.

ނައިބު ރައީސުންގެ މަގާމަށް އިންތިޚާބުކޮށްފައިވަނީ ކުރީގެ ޑިފެންސް މިނިސްޓަރ އާދަމް ޝަރީފް އުމަރު އަދި އިކޮނޮމިކް މިނިސްޓަރ މުހައްމަދު ސައީދެވެ. މި ހުރިހާ ފަރާތްތައްެވެސް ހޮވާފައިވަނީ 357ވޯޓުންނެވެ.

ޖަލްސާގައި ވަނީ އެ ޕާޓީގެ ކޮންގްރެސް ބޭއްވެން ދެން ވަގުތީ ހިންގާ ކޮމިޓީއެއް އެކުލަވާލައިފަ އެވެ. އެ ކޮމިޓީގައި އަބްދުއްރަހީމާއި ސައީދާއި އާދަމް ޝަރީފާއެކު، 40 ވަރަކަށް ބޭފުޅުން ހިމެނެއެެވެ. އޭގެ ތެރޭގައި ކުރީގެ ސަރުކާރުގެ މިނިސްޓަރުންނާއި، ކުންފުނިތަކުގެ ވެރިންނާއި، އިސް ސިޔާސީ ހަރަކާތްތެެރިން ހިމެނެއެވެ.

މި ޖަލްސާގައި ވަނީ ޕީއެންސީގެ އަސާސީ ގަވާއިދާއި، ރަސްމީ ކުލަވެސް ފާސްކޮށްފައެވެ. ޕީއެންސީގެ ރަސްމީ ކުލަޔަކީ ވިލުނޫކުލައެވެ. މިރޭގެ ޖަލްސާގައި ޝަރަފުވެރި މެހެމާނެއްގެ ގޮތުގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމް ބައިވެރިވެ ވަޑައިގަންނަވައެވެ.