އައި.ޖީ.އެމް.އެޗް އައިސީޓީ ފެސިލިޓީގެ މަސައްކަތަކީ ވިޔަފާރީގެ އުސޫލުން މިހާތަނަށް ކުރެވުނު އެންމެ ބޮޑު މަސައްކަތް: އާރު.ޑީ.ސީ

އިންދިރާ ގާންދީ މެމޯރިއަލް ހޮސްޕިޓަލް (އައި.ޖީ.އެމް.އެޗް) އައިސީޓީ ފެސިލިޓީގެ މަސައްކަތަކީ މިހާތަނަށް ކޮމަރޝަލްކޮށް ކުރެވުނު އެންމެ ބޮޑު މަސައްކަތްކަމަށް ރޯޑް ޑިވެލޮޕްމެންޓް ކޯޕަރޭޝަން (އާރު.ޑީ.ސީ) އިން ބުނެފިއެވެ.

އާރު.ޑީ.ސީއިން މިހެން ބުނެފައި ވަނީ އައި.ޖީ.އެމް.އެޗް 75 އެނދުގެ ވޯޑްގެ މަސައްކަތްތަކާ ބެހޭގޮތުން އެކްސްގައި ކޮށްފައިވާ ޕޯސްޓެއްގައެވެ. އާރު.ޑީ.ސީއިން ބުނނީ މި މަޝްރޫއުގެ ދަށުން ތަރައްގީކުރާ ޖެނެރަލް ވޯޑުގައި 45 އެނދުގެ ޖާގަ ހުންނާނެކަމަށާއި، ހައި ޑިޕެންޑެންސީ ޔުނިޓްގައި 15 އެނދުގެ ޖާގަ ހުންނާނެކަމަށެވެ. މީގެ އިތުރުން ވޯޑްގައި 32 ފާހާނަ އާއި، 6 ނަރުހުންގެ ސްޓޭޝަންތައް ގާއިމްކުރެވިފައި ހުންނާނެކަމަށް ވެސް އާރު.ޑީ.ސީ އިން ވަނީ ބުނެފައެވެ.

އައި.ޖީ.އެމް.އެޗް 75 އެނދުގެ ވޯޑް ތަރައްޤީކޮށްފައިވަނީ، ޒަމާނީ ވަސީލަތްތަކާއެކުގައެވެ. އެގޮތުން މި މަސައްކަތުގެ ދަށުން 75 މީޓަރަށްވުރެ ދިގުކޮށް ކޭބަލް އެޅުމާއި، 500 އަށްވުރެ ގިނަ ނެޓްވޯކް ޕޮއިންޓުގެ މަސައްކަތް ކުރެވިފައިވާކަމަށް އާރު.ޑީ.ސީއިން ވަނީ ބުނެފައެވެ. މީގެ އިތުރުން 24 އޮޓޮމެޓިކް ދޮރުގެ މަސައްކަތާއި، ޕްރައިމެރީ ނަރސް ކޯލް ސިސްޓަމް ނެޓްވޯކް ވެސް ވަނީ ގާއިމްކޮށްފައެވެ.

އައިޖީއެމްއެޗްގެ މި މަޝްރޫއުގެ އަމަލީ މަސައްކަތް ފަށާފައިވަނީ ނިމިދިޔަ 2024 ވަނަ އަހަރުގެ އޮކްޓޫބަރު މަހުގެ ތެރޭގައެވެ.