ހަލާކުވެފައިވާ އަމީނީ މަގު މާރާމާތު ކުރަނީ: މިރޭ މަސައްކަތް ފަށާނެ، މަގުން ބައެއް ބަންދު

ވަރަށް ބޮޑަށް ހަލާކުވެފައިވާ އަމީނީ މަގު މަރާމާތު ކުރުމުގެ މަސައްކަތް މިރޭ ފެށުމަށް ނިންމާފައިވާ ކަމަށް އެމްޓީސީސީން ބުނެފި އެވެ.

އަމީނީމަގަކީ މިދިޔަ ސަރުކާރުގައި އާރުޑީސީން ތާރުއަޅައި ނިންމާފައި އޮތް މަގެކެވެ. ނަމަވެސް މާގިނަދުވަހެއްނުވެ އެ މަގުގެ ބައެއް ސަރަހައްދު ވަނީ ވަރަށްބޮޑަށް ހަލާކުވެ އަޑިގުޑަން ހެދިފައެވެ. ހާއްސަކޮށް މާފަންނު ސްޓޭޑިއަމުން ފެށިގެން މަގުގެ ހުޅަނގަށް އޮންނަ ބައި ވަނީ އުޅަނދުފަހަރު ދުއްވަން އުނދަގޫވާވަރަށް ހަލާކުވެފައެވެ.

އެމްޓީސީސީން މިއަދު ބުނީ އަމީނީ މަހުގެ ސެގްމަންޓް އެކެއް މަރާމާތު ކުރުމުގެ މަސައްކަތް މިރޭ 00:00 ގައި ފަށާނެ ކަމަށެވެ. އެހެން ކަމުން އަމީނީ މަގުގެ އިއްޒުއްދީން މަގާ ދިމާވާ ހިސާބުން ފެށިގެން ދަރުމަވަންތަ ހޮސްޕިޓަލާއި ހަމައަށް އޮންނަ ސަރަހައްދު އާންމު ދަތުރުފަތުރަށް ބަންދުވާނެ ކަމަށެވެ.

މި ބަދަލާއި ގުޅިގެން ފުލުހުން ވަނީ ޓްރެފިކް ފްލޯއަށް ބަދަލުތަކެއް ގެނެސްފައިވާ ކަަމަށްވެސް ވަނީ ބުނެފަ އެވެ.

މަގުން ބައެއް ބަންދުކުރުމާއި ގުޅިގެން އެ ކުންފުނިން ދެމުންދާ އާރުޓީއެލް ބަހުގެ ޚިދުމަތުގައި ހިމެނޭ އޯކިޑް ރޫޓްގެ ދަތުރުތައް ދަރުމަވަންތަ ބަސް ހުއްޓިއަށް މަޑުކުރުމުގެ ބަދަލުގައި ދެން މަޑުކުރާނީ ވެސްޓްޕާކު ބަސް ހުއްޓިއަށް ކަމަށް ވެސް އެމްޓީސީސީން ބުންޏެވެ.

މި ބަދަލާއި ގުޅިގެން އަމީނީ މަގު ސެގްމަންޓް އެކެއްްގެ މަސައްކަތް ނިމެންދެން ސޯޝަލް ސެންޓަރ، އައިޖީއެމްއެޗް އަދި ދަރުމަވަންތަ ބަސް ހުއްޔިއަށް ދެން އެ ރޫޓްގެ ބަހެއް މަޑެއް ނުކުރާނެ އެވެ. އަދި އަމީނީ މަގުގެ މި ސެގްމަންޓްގެ މަސައްކަތް ނިމެންދެން އަމީނީ ރޫޓްގެ ބަހުގެ ޚިދުމަތް ވެސް މެދުކެނޑޭނެ އެވެ.

މީގެ އިތުރުން R7, R3, R1 އަދި R15 ރޫޓުތަކުން އެންމެ ފަހު މަންޒިލެއްގެ ގޮތުގައި މާލޭގައި ދެން މަޑުކުރާނީ މާފަންނު ބަސް ޓާމިނަލަށެވެ. މި ބަދަލާއި ގުޅިގެން އަމީނީ މަގު ސެގްމަންޓް އެކެއްގެ މަސައްކަތް ނިމެންދެން މި ރޫޓްތަކުން ފުޑް ކޯޓު, ދަރުމަވަންތަ އަދި ވެސްޓް ޕާކު ބަސް ހުއްޓިއަށް މަޑު ނުކުރާނެ އެވެ.