ކެއިންބުއިމުގައި އާއްމުކޮށް ބޭނުންކުރާ ތަކެތީގެ އަގުތައް މޮނީޓާކުރަނީ!

ކުރިއަށްއޮތް ރަމަޟާންމަހު ބާޒާރުގައި އާންމުކޮށް ކާބޯތަކެތީގެ ބާވަތްތަކުގެ އަގުތައް ބޮޑުވޭތޯ ބެލުމުގެ މަސައްކަތް ކުރިއަށްގެންދާނޭކަމަށް އިކޮނޮމިކް މިނިސްޓްރީން ބުނެފިއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އިކޮނޮމިކް މިނިސްޓްރީން ވަނީ ރަމަޟާންމަހު ބާޒާރުގެ އަގުތައް ބޮޑުވިޔަ ނުދިނުމަށްޓަކައި ސަރުކާރުން ކުރިއަށްގެންދާ ކަންކަމާބެހޭ މައުލޫމާތު ހިއްސާކުރައްވާފައެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވީ ރޯދަމަހު ކާބޯތަކެތީގެ އަގުތައް ބޮޑުވެދާނެތީ ސަރުކާރުން ދުރާލާ އެކަމަށް ތައްޔާރުވެފައިވާކަމަށެވެ. މިގޮތުން މީގެ ހަމަސްކުރިން އެކަމަށް ތައްޔާރުވަމުން އައިސްފައިވާކަން މިނިސްޓަރު ސައީދު ފާހަގަކުރެއްވިއެވެ.

ރޯދަމަހު ބާޒާރުގައި ދިވެހިން އެންމެ އާއްމުކޮށް ބޭނުންކުރާ ކާބޯތަކެތީގެ ބާވަތްތައް ބޮޑުވިޔަނުދިނުމަށް ކުރަމުންގެންދާ މަސައްކަތްތަކާ ބެހޭގޮތުން ވާހަކަދައްކަވަމުން މިނިސްޓަރު ވިދާޅުވީ، ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އާއި ގުޅިގެން ކާބޯތަކެތި ޑިސްޓްރިބިއުޓްކޮށް އެސްޓީއޯ މެދުވެރިކޮށް ތަކެތީގެ އަގު ކޮންޓްރޯލް ކުރުމުގެ މަސައްކަތް މާކުރިންވެސް މިނިސްޓްރީ އިން ކުރިއަށްގެންދާ ކަމަށެވެ. އެސްޓީއޯއާއި ހޯލްސޭލް ފަރާތްތަކާއި ގުޅިގެން ކުރާ މަސައްކަތުގެ ނަތީޖާއެއްގެ ގޮތުން ދުނިޔޭގެ އެހެން ތަންތަނުގައި ތަކެތީގެ އަގު އުފުލެމުންދާ ދުވަސްވަރެއްގައިވެސް ރާއްޖޭގައި ކެއިންބުއިމުގެ ބާވަތްތައް ދަތިކަމެއްނެތި ލިބެމުންދާކަން މިނިސްޓަރ ފާހަގަކުރެެއްވިއެވެ.

މިކަމާ ގުޅޭގޮތުން އިކޮނޮމިކް މިނިސްޓްރީން ބުނެފައިވަނީ އަސާސީ ތަކެތީގެ އަގުތައް އެއްވެސް ސަބަބަކާއި ނުލާ ބޮޑުކުރާނަމަ، މިނިސްޓްރީއިން އެކަމެް ބަލާނޭކަމަށެވެ. ކޮންމެ ދުވަހަކު ކަހަލަ ގޮތަަކަށް މޮނީޓާ ކުރުމުގެ ތެރެއިން އަގަށް އަންނަ ބަދަލުތައް ބަލަމުންގެންދާނޭކަމަށްވެސް މިނިސްޓްރީން ވަނީ ބުނެފައެވެ.

އިކޮނޮމިކް މިނިސްޓްރީން ވަނީ ތަކެތީގެ އަގު ބޮޑުވަމުންދާ މައްސަލައަށް ހައްލެއް ގެނައުމަށް ކުރަމުންގެންދާ މަސައްކަތުގެ ދަށުން  ރަމަޟާން މަހަށް ހާއްސަކޮށް ވަކި ނިޒާމެއް ތައާރަފްކުރާނޭކަމަށް ބުނެފައެވެ. އެ ސިސްޓަމް މެދުވެރިިކޮށް މިނިސްޓްރީގެ އިންސްޕެކްޝަން ޓީމްގެ އިތުރުން އާންމު ރައްޔިތުންނަށްވެސް  އަގާއި ބެހޭ މައްސަލަތައް ރިޕޯޓްކުރެވޭނެ ކަމަށް އެ މިނިސްޓްރީން ބުނެއެވެ.