ދޮންބަންޑާރައިންގެ މަތިވެރި ޖިހާދަކީ, މިއަދު ލިބިގަންނަންވީ އެންމެ އަގުހުރި ފިލާވަޅު: ރައީސް ޑރ.މުޢިއްޒު

ދޮންބަންޑާރައިންގެ މަތިވެރި ޖިހާދަކީ މިއަދު ލިބިގަންނަންވީ އެންމެ އަގުހުރި ފިލާވަޅުކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

ރައީސް ޑރ.މުޢިއްޒު މިފަދައިން ވިދާޅުވީ ހުރަވީ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ

މިގޮތުން ރައީސް ޑރ.މުޢިއްޒު ވިދާޅުވީ، ހުރަވީ ދުވަހަކީ ގައުމަށް އަމާނާތްތެރިވުމާއި ޚިޔާނާތްތެރިވުމުގެ މިސާލުވެސް ފެންނަ ދުވަހެއް ކަމަށެވެ. މިދުވަހުގެ ބަތަލު، ދޮންބަންޑާރައިންގެ މަތިވެރި ޖިހާދާއި ރިވެތި އަޚްލާގަކީ މިއަދު ލިބިގަންނަންވީ އެންމެ އަގުހުރި ފިލާވަޅުކަމަށް ރައީސް ޑރ.މުޢިއްޒު ވިދާޅުވިއެވެ.

ހުރަވީ ދުވަސް ކޮންމެ އަހަރަކުވެސް ފާހަގަކުރަނީ ހިޖުރީގޮތުން ޖުމާދުލްއާޚިރާ މަހުގެ 3 ވަނަ ދުވަހުއެވެ. މިއީ ދޮންބަންޑާރައިން ދިވެހިރާއްޖެ ހޮޅިންގެ އަތްދޮށުން މިނިވަންކޮށްދެއްވި ދުވަހާ ގުޅުވައިގެން ފާހަގަކުރަމުން އަންނަ ދުވަހެކެވެ.