ޑިމޮކްރެޓްސް ޓިކެޓްގައި މަޖިލީހަށް ވާދަކުރަން ހުށަހެޅީ 41 ދާއިރާއަށް، 46 ކެންޑިޑޭޓުން!

މާޗުމަހު އޮންނަ ރައްޔިތުންގެ މަޖިލީހުގެ އިންތިޚާބުގައި، ކުރީގެ ރައީސް މުހައްމަދު ނަޝީދު އިސްކޮށް ހުންނަވައިގެން އުފެއްދި ދަ ޑިމޮކްރެޓްސްގެ ޓިކެޓުގައި ވާދަކުރަން ހުޅުވާލި ފުރުސަތުގައި 41 ދާއީރާއަށް 46 ކެންޑިޑޭޓެއް ވާދަކުރަން ހުށަހަޅާފައިވާކަމަށް އެ ޕާޓީން ބުނެފިއެވެ.

މާރިޗު 17 ވަނަ ދުވަހު އޮންނަ 20 ވަނަ ރައްޔިތުންގެ މަޖިލީހުގެ އިންތިޚާބުގައި 93 ދާއިރާއަށްވެސް ވާދަކުރަން ނިންމައި، ޑިމޮކްރެޓްސް ޓިކެޓުގައި އެ ދާއިރާ ތަކަށް ވާދަކުރަން ބޭނުންވާ ފަރާތްތަކަށް ނަން ހުށަހެޅުމުގެ ފުރުސަތު ހުޅުވާލީ މިމަހު 4 ވަނަދުވަހުއެވެ.

ނަމަވެސް ޕްރައިމަރީގައި ވާދަކުރުމުގެ ފުރުޞަތު އާދީއްތަދުވަހު ހަމަވިއިރު، ޓިކެޓް ހޯދުމަށް އެދި ހުށަހެޅީ އެންމެ 41 ދާއިރާއަކަށް 46 ކެންޑިޑޭޓުންކަމަށް އެ ޕާޓީން ރޭ ވަނީ ބުނެފައެވެ. އޭގެތެރޭގައި ހިމެނެނީ 13 އަންހެނުންނާއި 33 ފިރިހެނުންކަމަށްވެސް ބުނެފައިވެއެވެ.

މީގެ އިތުރުން ޑިމޮކްރެޓްސްއިން ބުނީ ޕާޓީގެ ޕްރައިމަރީގައި ވާދަކުރުމަށް އެދި، އެންމެ މެމްބަރަކު ކުރިމަތިލާފައިވާ ދާއިރާތަކުގެ ޓިކެޓް އެ ފަރާތްތަކަށް ކަށަވަރުވެފައިވާކަމަށާ، އަދި، އެއް ކެންޑިޑޭޓަށް ވުރެ ގިނަ ކެންޑިޑޭޓުން ކުރިމަތިލާފައިވާ ދާއިރާތަކުގައި ބާއްވާ ޕްރައިމަރީ އަންނަ މަހުގެ 3 ވަނަ ދުވަހު އޮންނާނެކަމަށެވެ.

ޑިމޮކްރެޓްސްއިން ވަނީ ނިމިދިޔަ ރިޔާސީ އިންތިޚާބުގައިވެސް އެ ޕާޓީގެ ކެންޑިޑޭޓެއް ނެރެފައެވެ. ނަމަވެސް، އެ އިންތިޚާބުގައި ޕާޓީ ކެންޑިޑޭޓް އިލްޔާސް ލަބީބަށް ލިބިވަޑައިގެންނެވީ ގާތްގަނޑަކަށް 16,000 ވޯޓެވެ.