ބަންގްލަދޭޝް އިން ވަގުތީގޮތުން އޮންއެރައިވަލް ވިސާ ދިނުން ހުއްޓާލަނީ

އަންނަ ބްރާސްފަތި ދުވަހުން ފެށިގެން ބަންގްލަދޭޝްއަށް ދަތުރުކުރާ މީހުންނަށް ވަގުތީގޮތުން އޮންއެރައިވަލް ވިސާ ދިނުން ހުއްޓާލުމަށް އެޤައުމުން ނިންމައިފިއެވެ.

ބަންގްލަދޭޝްގެ ކަމާބެހޭ ފަރާތްތަކުން މިގޮތަށް ނިންމާފައިވަނީ ކުރިއަށްއޮތް އެޤައުމުގެ ރައްޔިތުން މަޖިލީހުގެ އިންތިހާބާ ދިމާކޮށް އަޅާ ފިޔަވަޅެއްގެ ގޮތުންނެވެ. އެޤައުމުގެ ކަމާބެހޭ އިދާރާއިން ވަނީ ޖެނުއަރީމަހުގެ 15 ވަނަ ދުވަހުން ފެށިގެން ފެބުރުއަރީމަހުގެ 15 ވަނަ ދުވަހުގެ ނިޔަލަށް އެ ޤައުމަށް ޒިޔާރަތްކުރާ ފަރާތްތަކަށް އޮން އެރައިވަލް ވިސާދިނުން ވަގުތީގޮތުން ހުއްޓާލުމަށް ނިންމާފައެވެ.

މިކަމާ ގުޅިގެން ދިވެހި ހާރިޖިއްޔާއިން ވަނީ، ބަންގްލަދޭޝްއަށް ދަތުރުކުރާ ދިވެހިން މިކަމަށް ސަމާލުވުމަށް އެދިފައެވެ.

އެގޮތުން އެ މުއްދަތުގެ ތެރޭގައި ބަންގްލަދޭޝްއަށް ދަތުރުކުރާނަމަ، ދަތުރުކުރުމުގެ ކުރިން ރާއްޖޭގައި ހުންނަ އެޤައުމުގެ ހައިކޮމިޝަނުން ބޭނުންވާ ވިސާ ނެގުމަށް ހާރިޖިއްޔާއިން ވަނީ އިލްތިމާސްކޮށްފައެވެ.

ބަންގްލަދޭޝްގެ ސިޔާސީ މަޝްރަހު ވަރަށްބޮޑަށް ބަދަލުވެފައިވާއިރު، މިއީ ހަސީނާގެ ވެރިކަމަށްފަހު ފުރަތަމަ ފަހަރަށް ބާއްވާ އާއްމު އިންތިހާބެވެ. ބަންގްލަދޭޝްގެ ވެރިކަން ދޫކުރައްވައި ހަސީނާ ވަޑައިގެންނެވުމާއެކު، އޭރު ހިނގައިދިޔަ ކަންތައްތަކާ ގުޅިގެން ޤާނޫނު ހަދާ މަޖިލީސްވެސް ވަނީ އުވާލާފައެވެ.