32 ރަށެއްގެ ކުނި މެނޭޖްކުރާ މަރުކަޒުތައް ހެދުމަށް ވެމްކޯއާ ހަވާލުކޮށްފި

އަތޮޅުތެރޭގެ ރަށްތަކުގައި ކުނި ނައްތާލުމަށް ސަރުކާރުން ކުރަމުންގެންދާ މަސައްކަތްތަކުގެ ތެރެއިން 32 ރަށެއްގެ ކުނި މެނޭޖްކުރާ މަރުކަޒުތައް ހެދުމަށް ވެމްކޯއާ ހަވާލުކޮށްފިއެވެ.

މިކަމާ ގުޅޭގޮތުން މިނިސްޓްރީ އޮފް ޓޫރިޒަމް އެންޑް އެންވަޔަރަމަންޓުން ބުނީ 32 ރަށެއްގެ ކުނި ނައްތާލުމަށް މަރުކަޒުތައް ހެދުމަށް ވޭސްޓް މެނޭޖްމަންޓް ކޯޕަރޭޝަން، ވެމްކޯއާ ހަވާލުކުރީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ރިޔާސީ ބަޔާނުގައި ވިދާޅުވެފައިވާ ވައުދުފުޅުގެ ތެރެއިން ކަމަށެވެ.  މިއަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާ އިއުލާނުކުރައްވާފައިވަނީ. މިއަހަރު ނިމުމުގެ ކުރިން ރާއްޖޭގެ ހުރިހާ ރަށެއްގައި އެރަށަކަށް އެކަށޭނެ ކުނި މެނޭޖްކުރާނޭ ނިޒާމާއި ވަސީލަތްތައް ޤާއިމްކޮށްދެއްވުމަށެވެ.

މި އަމާޒަށް ވާސިލުވުމަށްޓަކައި ތިމާވެއްޓާބެހޭ ވުޒާރާއިން މިއަދު ވަނީ ޗެމްކޯއާއެކު މިކަމުގެ އެއްބަސްވުމުގައި ސޮއިކޮށްފައެވެ. ތިމާވެއްޓާބެހޭ ވުޒާރާއިން ވަނީ މިއަހަރުގެ ފެބުރުއަރީމަހުގެ ތެރޭގައިވެސް ދެ ރަށެއްގައި ކުންޏާއި ވަސީލަތްތައް މެނޭޖްކުރާ މަރުކަޒު ޤާއިމްކުރުމުގެ މަސައްކަތް ވެމްކޯއާ ހަވާލުކޮށްފައެވެ.

ވެމްކޯއާއެކު މިއަދު ޤާއިމްކުރެވުނު އެއްބަސްވުމާއެކު ޖުމްލަ 34 ރަށެއްގައި ވޭސްޓް މެނޭޖްމަންޓް އިންފްރާސްޓަކްޗަރ ޤާއިމްކުރުމުގެ މަސައްކަތް ވެމްކޯއިން ކުރިއަށްގެންދާނެއެވެ. އަދި މި މަސައްކަތް މިއަހަރުގެ 3 ވަނަ ކުއާޓަރުގެ ނިޔަލަށް ނިންމުމަށް ހަމަޖެހިފައިވާކަމަށްވެސް ތިމާވެއްޓާ ބެހޭ ވުޒާރާއިްނ ބުނެއެވެ.

ރައީސުލްޖުމްހޫރިއްޔާ އިއުލާނުކުރައްވާފައިވާ އަމާޒަށް ވާސިލްވުމަށްޓަކައި 124 ރަށެއްގައި ކުނި މެނޭޖްކުރުމަށް ބޭނުންވާ އިންފްރާސްޓަކްޗަރ ޤާއިމްކުރަން ޖެހެއެވެ. ތިމާވެއްޓާބެހޭ ވުޒާރާއިން ބުނީ ވަރަށް ކައިރި މުސްތަޤްބަލެއްގައި ބާކީހުރި ރަށްތަކުގެ މަސައްކަތްތައް ސަރުކާރު ހިއްސާވާ އެހެން ކުންފުނިތަކާ ހަވާލުކުރުމުގެ މަސައްކަތް ކުރިއަށްގެންދާނޭ ކަމަށެވެ. މީގެ ތެރޭގައި އެމްޓީސީސީ، ފެނަކަ އަދި އާރުޑީސީ ހިމެނެއެވެ.

ރައްކާތެރި އަދި ދެމެހެއްޓެނިވި ގޮތެއްގައި ކުނި މެނޭޖްކުރުމުގެ ނިޒާމުތައް މުޅި ރާއްޖޭގައި ޤާއިމްކުރުމަކީ ރައީސުލްޖުމްހޫރިއްޔާ ވަރަށްބޮޑު އިސްކަމެއްދެއްވައިގެން ވަރަށް ގާތުން ބައްލަވަމުންގެންދަވާ މަސައްކަތެއްކަމަށް ތިމާވެއްޓާބެހޭ ވުޒާރާއިން ބުނެއެވެ.