ބަޙްރެއިންގެ ޚާރިޖީ ވަޒީރާ މިނިސްޓަރ ޒަމީރު ބައްދަލުކުރައްވައިފި

ބަހްރެއިންގެ ޚާރިޖީ ވަޒީރު ޑރ.އަބްދުއްލަތީފް ބިން ރާޝިދު އަލް ޒަޔާނީއާ މިނިސްޓަރ ޒަމީރު ބައްދަލުކުރައްވައިފިއެވެ.

ރާއްޖޭގެ ފޮރިންމިނިސްޓްރީން މައުލޫމާތު ދެއްވި ގޮތުގއި މިއަދު މަނާމާގައި ބަޙްރެއިންގެ ޚާރިޖީ މިނިސްޓްރީގައި ބޭއްވުނު މި ބައްދަލުވުމުގައި ދެ ޤައުމުގެ ދެމެދުގައިވާ އިސްލާމީ އާދަކާދައާއި، ހަމަތަކާއި އަދި އަގުތަކުގެ މައްޗަށް ބިނާވެފައިވާ ގާތް ގުޅުމާއި އެއްބާރުލުމުގެ މަޝްވަރާތައް ކުރެވުނެވެ.

މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ ދެ ޤައުމުގެ ދެމެދުގައިވާ ގުޅުން އިތުރަށް ހަރުދަނާކުރުމާއި، އިޤްތިޞާދީ އެއްބާރުލުން އިތުރުކުރުމުގެ ފުރުޞަތުތަކާ ބެހޭގޮތުންނެވެ. މީގެ އިތުރުން ދެ ޤައުމުގެ ދެމެދުގައި ފުރަތަމަ ފަހަރަށް ސިޔާސީ މަޝްވަރާ ބައްދަލުވުމެއް ބޭއްވުމާ ބެހޭގޮތުންވެސް މަޝްވަރާކުރެވުނު ކަމަށްވެސް ފޮރިންމިނިސްޓްރީން ހާމަކުރެއްވިއެވެ.

މި ބައްދަލުކުރެއްވުމުގައި މިނިސްޓަރ ޒަމީރު ވަނީ ބަޙްރެއިންގެ ފަރާތުން ދިވެހިރާއްޖެއަށް އަބަދުވެސް ދެއްވަމުން ގެންދަވާ ސަމާލުކަމަށް ޝުކުރު އަދާކުރައްވާފައެވެ. އަދި މި ދަތުރުފުޅާ ގުޅިގެން ދެ ޤައުމުގެ ދެމެދުގައިވާ ގުޅުން އިތުރަށް ބަދަހިވެގެންދާނެ ކަމުގެ އުންމީދު ފާޅުކުރައްވާފައިވެއެވެ.

މި ބައްދަލުވުމުގައި މިނިސްޓަރ ޒަމީރުގެ އިތުރުން އެމްބެސެޑަރ އެޓް ލާޖް އަޙްމަދު ނަޞީރުއާއި، ބައިލެޓަރަލް ސެކްރެޓަރީ ޑރ.ހާލާ ޙަމީދުއާއި ޖޮއިންޓް ސެކްރެޓަރީ މަރްޔަމް ރީޝާ އަދި އެސިސްޓެންޓް ޑިރެކްޓަރ މިޒްނާ ވަޙީދު ބައިވެރިވެވަޑައިގެންނެވިއެވެ.