މިފްކޯއިން ކުޑަގިރިއަށް 500 ގަސް ހަދިޔާކޮށްފި

މިފްކޯއިން ކުޑަގިރިއަށް 500 ގަސް ހަދިޔާކޮށް، ފަސް މިލިއަން ގަސް ޕްރޮގްރާމުގައި ބައިވެރިވެއްޖެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވާފައިވާ ފަސް މިލިއަން ގަސް އިންދުމުގެ ޕްރޮގްރާމުގައި މިފްކޯއިން ބައިވެރިވެ، މާލެ އަތޮޅު ޕިކްނިކް އައިލެންޑް ކުޑަގިރިއަށް 500 ގަސްތައް ހަދިޔާކުރުމަށް މިފްކޯގެ ގިނަ އަދަދެއްގެ މުވައްޒަފުން ކުޑަގިރީގެ މެނޭޖްމަންޓާއެކު އެ ރަށުގައި ޚާއްޞަ ހަފްލާއެއް ބާއްވާފައިވެއެވެ.

މި ހަފްލާގައި މިފްކޯއިން ވަނީ ރައީސް މުޢިއްޒުގެ ތިމާވެށީގެ ސިޔާސަތުތަކަށް ތަޢުރީފުކޮށް، އެ މަސައްކަތްތައް ކުރިއަށް އޮތް ތަނުގައި ފުޅާކުރާނެ ކަމަށް އިޢުލާނުކޮށްފައެވެ.

ކުޑަގިރިން ވަނީ މިފްކޯއަށް ޝުކުރު އަދާކޮށް، އެ ރަށް ފެހިކުރުމަށްޓަކައި ކުރެވޭ މަސައްކަތުގެ ތަފްސީލާއި، އެޗްޑީސީގެ މެނޭޖްމަންޓުން ގެންގުޅޭ ހަރުދަނާ ޕްލޭންގެ ބައެއް މަޢުލޫމާތު ހިއްސާކޮށްފައެވެ.

މިފްކޯއިން ކުޑަގިރިއަށް ހަދިޔާކުރި ގަސްތަކުގެ ތެރޭގައި ގިނަ އަދަދަކަށް ހިޔާވަހިކަން ލިބޭ ބާވަތްތައް ހިމެނެއެވެ. އޭގެ ތެރޭގައި ހިރުނދާއި ދިއްގާގެ އިތުރުން ދިވެހި ރުއްވެސް ހިމެނެއެވެ. މިފްކޯއިން އެޗްޑީސީ އާއި ކުޑަގިރީގެ މެނޭޖްމަންޓުން ދިން އެހީތެރިކަމާއި އެއްބާރުލުން ފާހަގަކޮށްފައިވެއެވެ.

މީގެކުރިން، މޯލްޑިވްސް އިސްލާމިކް ބޭންކުން ވެސް ވަނީ ކުޑަގިރީގައި 1000 ގަސް އިންދުމަށް ކްލީން މޯލްޑިވްސް ޖަމްޢިއްޔާއާއެކު އެއްބަސްވުމެއްގައި ސޮއިކޮށްފައެވެ.