ނަޝީދަކީ ރާއްޖެއަށް ލާދީނީ ކަންކަން ފެތުރުމަށް ރައީސް ސޯލިހު ބޭނުންކުރާ ޓޫލްއެއް: އިދިކޮޅު

ރައްޔިތުންގެ މަޖިލީހުގެ ރައީސް މުހައްމަދު ނަޝީދަކީ ރާއްޖެއަށް ލާދީނީ ކަންކަން ފެތުރުމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ބޭނުންކުރާ ޓޫލްއެއް ކަމަށް އިދިކޮޅު ކޯލިޝަނުން ބުނެފިއެވެ.

ޖަމުއިއްޔަތުއް ސަލަފް އުވާލުމަށްޓަކައި ރައްޔިތުންގެ މަޖިލިހުން ކުރަމުންދާ މަސައްކަތްތައް ކުށްވެރިކޮށް ޕްރޮގްރެސިވް ކޮންގްރެސް ކޯލިޝަނުން މިރޭ ނެރުނު ނޫސްބަޔާނެއްގައި ބުނީ، ރާއްޖޭގައި އިސްލާމްދީނުގެ މަތިވެރި ޝިއާރު އުފުލާ، ގައުމުގައި ދީނީ ހޭލުންތެރިކަން އިތުރުކުރުމަށް ސަލަފް ޖަމްއިއްޔާ އިން މަސައްކަތް ކުރާތީ އެކަން ހަޖަމް ނުވެގެން އެ ޖަމްޢިއްޔާއަކީ ނިރުބަވެރިކަމަށް ވާގިވެރިވާ ބައެއްކަމަށް، ނިންނީ ސާބިތު އެއްވެސް ހެއްކެތް ނެތި ކަމަށެވެ.

ސަލަފާ ގުޅޭގޮތުން ސާބިތު ހެއްކެތްނެތި ރައީސް ނަޝީދު ކުރައްވަމުންދާ ދޮގު ތުހުމަތުތައް ހުއްޓާލުމަށް ގޮވައިލައި ބަޔާނުގައި ބުނީ، ދީނީ ޖަމާޢަތްތަކަށް ހުރަސްއެޅުމަކީ މިއަދު އެމްޑީޕީގެ އެޖެންޑާއެއް ކަމަށެވެ.

ސަލަފް ޖަމްޢިއްޔާއާ ގުޅޭގޮތުން ނަޝީދު ހެއްދެވީ، އާދަކާދައިގެ މަތިން، ބޮޑެތި ދޮގުތަކެއްކަން މިހާރުވެސް ފަޅާއަރާ ސާބިތުވެފައިވާހިނދު، ނަޝީދަކީ، ވަކި ސިޔާސީ މަޤްސަދެއް ޙާޞިލް ކުރައްވަން މިފަދަ ޙަޤީޤަތާ ޚިލާފު ވާހަކަތައް ފެތުރުއްވުމުގެ ދެވަނައެއް ނެތްފަދަ ނަމޫނާއެއް ކަމަށް ތާރީހު ހެކިދޭ ކަމަށް ވެސް ބަޔާނުުގައި ވެއެވެ.

'' ރައީސް ނަޝީދަކީ ލާދީނީ ކަންކަން ފެތުރުމަށް ރައީސް ސޯލިހު ބޭނުންކުރާ ޓޫލްއެއް ކަމުގައި މި ކޯލިޝަނުން ދެކެމެވެ. މިކަންކަމާ ދެކޮޅަށް ރައީސް ސޯލިހަށް އެއްޗެއް ބުނަން ކެރިވަޑައިނުގަންނަވާތީ މި ކޯލިޝަނުން ނިހާޔަތަށް ކަންބޮޑުވަމެވެ. ސަރުކާރާއި މަޖިލިސް ލިބިފައި އޮތުމަކީ ރައްޔިތުންގެ ނުރުހުމުގައި ކަންކަންކުރަން އަދި ޤާނޫނު އަސާސީއާއި ޤާނޫނުުތައް މުގުރަން އެމްޑީޕީއަށް އޮތް ފުރުސަތެއް ނޫންކަންވެސް އަންގަމެވެ.'' އިދިކޮޅުން ނެރުނު ބަޔާނުގައި ވެއެވެ.

ހަމައެއާއެކު ޝައިހު އިމްރާން ޢަބްދުﷲއާއި ޢަދާލަތު ޕާޓީ މި ސަރުކާރުގެ ތެރޭގައި އޮވެ، އެކަމަށް ވާގިވެރިވެދޭކަން ވަރަށް ސާފުކޮށް ފެންނަން އެބައޮތް ކަމަށްވެސް ބަޔާނުގައި ވެއެވެ.

ސަލަފް ޖަމްޢިއްޔާގެ ފަހަތުގައި މި ސަރުކާރުން އަޅުވާލުމަކީ، ޝަރުޢީ ނިޒާމް ފުނޑާލުމުގެ އަޑު ބޭރު ދުނިޔޭގައި ފެތުރެން ފެށުމުން ބައިނަލްއަޤްވާމީ ސަޕޯޓް ގެއްލިދާނެ ކަމުގެ ބިރުހީވެގެން އެފަރާތްތައް ރުއްސުމަށްޓަކައި ޖަހާލި މޮޅު ސްޓަންޓެއް ކަމަށް ވެސް އިދިކޮޅުގެ ބަޔާނުގައި ފާހަގަކޮށްފައިވެއެވެ.