މަޓީން އެދުނުގޮތަށް ކުޑަނުކޮށް, ބޭރުފައިސާ އާ ބެހޭ ބިލް ކޮމިޓީން ފާސްކޮށްފި
ލިޔުންތެރިޔާ
އަބްދުﷲ ހުސައިން
ރިސޯޓްތައް ހިއްސާވާ ޖަމިއްޔާ، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަރސްޓްރީ (މަޓީ) އިން ހުށަހެޅިގޮތަށް ކުޑަނުކޮށް, ބޭރުފައިސާ އާ ބެހޭ ބިލް ކޮމިޓީން ފާސްކޮށްފިއެވެ.
މަޖިލީހުގެ މާލިއްޔަތު ކޮމިޓީން މިއަދު ވަނީ ބޭރުފައިސާ މާރުކުރުމުގެ ބިލް ދިރާސާކުރުމުގެ މަސައްކަތްތަކުގެ ތެރެއިން އެ ބިލަށް ހިޔާލު ހޯދުމަށް މަޓީއާ ބައްދަލުކޮށްފައެވެ. ނަމަވެސް މަޓީއާއެކު ބޭއްވި ބައްދަލުވުން ކުރިއަށްގެންދިޔައީ، އެ ޖަމިއްޔާގެ އެދުމުގެ މަތިން ސިއްރުކޮށްގެންނެވެ. މަޓީގެ ފަރާތުން ބައްދަލުވުމުގައި ކްރައުން ކުންފުނީގެ ނަޒީރު ބައިވެރިވެ ވަޑައިގެންނެވިއެވެ. ވޮއިސްއަށް މައުލޫމާތު ލިބިފައިވާ ގޮތުގައި މަޓީން ހުށަހަޅާފައިވަނީ، މާރުކުރުން މަޖުބޫރުވާ އަދަދު އެންމެ މަތިވެގެން 15 އިންސައްތައިގަ ބެހެއްޓުމަށެވެ.
މާލިއްޔަތު ކޮމިޓީން މިއަދު ވަނީ ބޭރުފައިސާ މާރުކުރުމާ ބެހޭ ބިލް މިއަދު ހަވީރު ފާސްކޮށްފައެވެ. ނަމަވެސް ފާސްކުރިއިރު މަޓީން ހުށަހެޅި މުހިއްމު ބައި ބިލުގައި ހިމަނާފައެއް ނުވެއެވެ. މަޓީން ހުށަހަޅާފައިވަނީ މާރުކުރުން މަޖުބޫރުކުރާ އަދަދު 10 އިންސައްތަ އާއި 15 އިންސައްތައިގަ ބެހެއްޓުމަށެވެ. ބިލަށް ގެނައި ފާހަގަކޮށްލެވުނު އެއް އިސްލާހަކީ ބޭރުފައިސާ މާރުކުރަން ޖެހޭ އުމުރުފުރާ 10 އަހަރުން 12 އަހަރަށް ދަށްކުރުމެވެ.
އަދި ރިސޯޓެއްގެ މާލީހާލަތު ދަށްނަމަ ބޭރުފައިސާގެ ގޮތުގައި ލިބޭ އާމްދަނީ މާރުކުރަންޖެހޭ ނިސްބަތް 20 އިންސައްތައަށްވުރެ ދަށުން މާރުކުރުމުގެ ފުރުސަތު ކަނޑައެޅިފައިވާ އުސޫލްތަކުގެ ދަށުން ދިނުން ހިމެނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
