ޒަމާނީ ފެންވަރަށް ހެދުމަށްފަހު އަމީނީމަގުގެ ބޮޑު ބައެއް މާދަމާ ހުޅުވާލަނީ

2022 ވަނަ އަހަރު ޒަމާނީ ފެންވަރަށް ތަރައްޤީ ކުރުމަށް ފެށުނު އަމީނީމަގުގެ ފަހު ފިޔަވަހީގެ ތާރުއަޅާ މަސައްކަތް ނިމިފައި އޮތް ބައި މާދަމާ ހެނދުނު ހުޅުވާލަން ނިންމައިފި އެވެ.

ރައީސް ޑރ.މުހައްމަދު މުއިއްޒުގެ މި ސަރުކާރުގެ އިމާރާތް ކުރުމާއި ބިނާރާ ބެހޭ ވުޒާރާއިން މިރޭ އެކްސްގައި ބުނެފައިވަނީ  އަމީނީމަގާއި އިއްޒުއްދީން މަގު ގުޅޭ ޖަންކްޝަން އަދި ކަނބާ އައިސާރަނި ހިނގުމާއި އަމީނީމަގު ގުޅޭ ޖަންކްޝަން މާދަމާ ހެނދުނު 6ގައި ޓްރެފިކަށް ހުޅުވާލާނެކަމަށާއި، އަދި އަމީނީމަގުގެ ސެގްމަންޓް 12 އަދި 13 މުޅިން ހުޅުވާލާނެ ކަމަށެވެ .

" މާދަމާ (10.1.2024) ހެނދުނު 6:00  ގައި އަމީނީމަގާއި އިއްޒުއްދީން މަގު ގުޅޭ ޖަންކްޝަން އަދި ކަނބާ އައިސަރަނި ހިނގުމާ އަމީނީ މަގު ގުޅޭ ޖަންކްޝަން ޓްރެފިކަށް ހުޅުވާލެވޭނެ / ހޮނިހިރު ދުވަހު (13/1/24) ހެނދުނު  6:00  ގައި  އަމީނީމަގުގެ  ސެގްމަންޓް  12  އަދި  13  މުޅިން  ހުޅުވާލެވޭނެ"

މިނިސްޓްރީގެ ޕޯސްޓުގައި ބުނެފައިވެއެވެ.

މިދިޔަ ސަރުކާރުން އަމީނީމަގު ރަނގަޅު ފެންވަރަކަށް ހެދުމުގެ ޢަމަލީ މަސައްކަތް ފަށާފައިވަނީ 2022 ވަނަ އަހަރުގެ އޯގަސްޓް މަހުގެ ތެރޭގައެވެ. ނަމަވެސް ތަފާތު ސަބަބުތަކާއި ހެދި ދިގުލައިގެން ގޮސް، މަގުގެ މަސައްކަތް މެދުކެނޑާލީ މިދިޔަ އަހަރުގެ ރިޔާސީ އިންތިޚާބަށް ކައިރިވެފައިވަނިކޮށެވެ. އޭރު ނުނިމި އޮތީ 2 ސެގުމެންޓުގެ މަސައްކަތެވެ.

މި ސަރުކާރުން އަމީނީ މަގުގެ މަސައްކަތް އަލުން ފެށީ، މިދިޔަ މަހުގެ 9 ގައެވެ. ނުނިމި ބާކީ ހުރި ހުރިހާ ބައެއްގައި ތާރު އަޅައި މިދިޔަ އާދީއްތަ ދުވަހު ވަނީ ނިންމާލާފައެވެ. އެއީ ދިވެހިރާއްޖޭގެ އަޑުގެ ރޭޑިއޯ ބިލްޑިންއާ ހިސާބުން ފެށިގެން އަމީނީމަގުގެ ހުޅަނގުން ބާކީ ހުރި ބައިތަކެވެ.

މި ސަރުކާރުން ނިންމި 2 ސެގްމެންޓުގެ މަސައްކަތް ނިންމާފައިވަނީ ކުރީގެ ސެގުމެންޓުތަކަށްވުރެ މަގު ފުޅާކޮށް ސްކޯޕަށް ބަދަލުތަކެއް ގެނެސްގެން ކަމަށާއި،  އެ 2 ސެގުމެންޓުގައި 4 ލޭން އޮންނާނެކަމަށް އާރުޑީސީ އިން މަޢުލޫމާތު ދެއްވައެވެ.