ކުޑަކުދިން ކުށުގެ މާހައުލަށް ހުށަހެޅޭ ސަބަބުތައް ހޯދުމަށް ދިރާސާއެއް ހަދަނީ

ކުޑަކުދިން ކުށުގެ މާހައުލަށް ހުށަހެޅި ކުށްތަކަށް އަރައިގަތުމަށް މެދުވެރިވާ ސަބަބުތައް ހޯދުމަށް ދިރާސާއެއް ހަދަން ދާހިލީ ސަލާމަތާއި ފައްނިންޔަތާބެހޭ ވުޒާރާއިން ނިންމައިފިއެވެ.

މިކަމާއި ގުޅޭގޮތުން ދައުލަތުގެ މީޑިއާ ޕީއެސްއެމަށް މައުލޫމާތު ދެމުން އެ ވުޒާރާއިން ބުނީ، ކުޑަކުދިން ކުށުގެ މާހައުލަށް ހުށަހެޅޭ މައްސަލަތައް ދެނެގަނެ އެކަމުގައި ރާއްޖޭގެ ހާލަތު މިހާތަނައް ދެނެގަނެވިފައި ނެތްކަމަށާއި، ސައިންޓިފިކަލީ އެކަމަށް ދިރާސާއެއްވެސް ހެދިފައި ނުވާކަމަށެވެ.

އެހެންކަމުން ކުޑަކުދިންގެ މި ފަދަ ކަންކަން ދެނެގަނެ ހައްލުކުރުމަށް ކުށްތަކަށް އަރައިގަންނަ ސަބަބުތައް ދެނެގަތުމަށް ދިރާސާއެއް ހެދުމުގެ މަސައްކަތް ކުރަމުންދާކަން ފާހަގަކޮށް އެ ވުޒާރާއިން ބުނީ، މި ދިރާސާގެ މައިގަނޑު މަގްސަދަކީ މުޖްތަމައުގައި މި ހިމެނޭ ކުޑަކުދިން ކުށުގެ މާހައުލުން ސަލާމަތްކުރުމާއި މުޖްތަމައުގައި މިފަދަ ކަންކަމަށް މަގުފަހިވާކަންކަން ދެނެގަނެ އެކަމަަށް ފިޔަވަޅު އެޅުންކަމަށެވެ.

މި ދިރާސާގައި ކުޑަ ކުދިން ކުށުގެ މާހައުލަށް ހުށައެޅެނީ ކީއްވެކަމާއި އެ ކުދިން އެހިސާބަށް ދަނީ ކީއްވެކަމާއި އަދި ކުޑަ ކުދިންގެ ތެރޭގައި އެންމެ ޓްރެންޑް ވަނީ ކޮން ކަމެއްކަން ދެނެގަތުމުގެ އިތުރުން، ކުށުގެ މާހައުލަށް ޅައުމުރުގައި ދާ ކުދިން އަންބުރާ މުޖުތަމައުއަށް ގެނައުމަށްޓަކައި ކުރަން ޖެހޭ މަސައްކަތްތައްވެސް ކުރާނެކަމަށް އެ ވުޒާރާއިން ބުނެއެވެ.

މި ދިރާސާ ހެދުމަށް ފަންޑު ހޯދުމަށް ޔުނިސެފްއާއެކު އެ ވުޒާރާއިން މަސައްކަތް ކުރަމުން އަންނައިރު، މިއީ ދިވެހިރާއްޖޭގެ އިސްލާމިކް ޔުނިވާރސިޓީއާއި ގުޅިގެންކަމަށާއި މިއީ މުޅި ރާއްޖެއަށް އަމާޒުކޮށްގެން ކުރިއަތް ގެންދާ ދިރާސާއެއްކަމަށް އެ ވުޒާރާއިން މައުލޫމާތުދެއެވެ.