މެޖިސްޓްރޭޓް ކޯޓުތަކުން ކައިވެނީގެ ފޯމާ އެކު ތެލެސީމިއާ ކާޑު ހުށަހެޅުން ލާޒިމުކޮށްފި

އޮކްޓޫބަރު މަހުގެ ފުރަތަމަ ދުވަހުން ފެށިގެން ކައިވެނިކުރުމަށް އެދި މެޖިސްޓްރޭޓް ކޯޓުތަކަށް ހުށަހަޅާ ފޯމާ އެކު ތެލެސީމިއާ ޓެސްޓުގެ ނަތީޖާ ހުށަހެޅުން ލާޒިމުކޮށްފިއެވެ.

މެޖިސްޓްރޭޓް ކޯޓް ތަކުން އިއްޔެ ކުރި އިއުލާނެއްގައި ބުނެފައިވާގޮތުން މި ބަދަލު ގެނައީ ގަވާއިދު ނަންބަރު 2026/R-60 "މެޖިސްޓްރޭޓް ކޯޓުތަކުގެ ގަވާއިދު" ގެ 83 ވަނަ މާއްދާގެ ދަށުންނެވެ.

އެ މާއްދާގައި ބަޔާންކޮށްފައިވާ ގޮތުން ކައިވެންޏަށް އެދޭ ދެ ފަރާތް ވެސް ތެލެސީމިއާއަށް ޓެސްޓުކޮށް ލިބޭ ނަތީޖާ ކަމަށްވާ ތެލެސީމިއާ ކާޑު ފޯމާ އެކު ހުށަހަޅަންޖެހޭނެއެވެ.

ނަމަވެސް ކައިވެންޏަށް އެދޭ ދެ މީހުންގެ ތެރެއިން އެކެއްގެ ކިބައިގައި ތެލެސީމިއާ ވާރުތަކުރާ ގޮތް ނެތް ކަމަށް ޓެސްޓުން ދައްކައިފި ނަމަ ދެވަނަ މީހާ ޓެސްޓުގެ ނަތީޖާ ހުށަހެޅުން ލާޒިމެއް ނުވާނެއެވެ.

މެޖިސްޓްރޭޓް ކޯޓް ތަކުން މިފަދައިން އިއުލާން ކޮށްފައިވާއިރު، އާބާދީގެ ނިސްބަތުން ތެލެސީމިއާ ލޭ އަޅާ މީހުން އެންމެ ގިނަ ގައުމަކީ ރާއްޖެއެވެ. ކައިވެނީގެ ކުރިން ތެލެސީމިއާ ޓެސްޓް ހެދުމުގެ މައިގަނޑު ބޭނުމަކީ އެކަން ވާރުތަކުރާ ކެރިއަރުން ކުރީބައިގައި ދެނެގަނެ ތެލެސީމިއާ މޭޖާ ކުދިން އުފަންވާ ނިސްބަތް ދަށްކުރުމެވެ.

މި ގަވާއިދަށް ޢަމަލުކުރަން ފެށުމަށް ހަމަޖެހިފައި ވަނީ މާދަމާއިން ފެށިގެންނެވެ.