ގޭންގްތައް އުޅޭ ސަރަހައްދުތަކުގައި ފުލުހުން ޑިއުޓީ ކުރަން ފަށައިފި!

މޯލްޑިވްސް ޕޮލިސް ސަރވިސްއިން ގޭންގް ކުށްތައް ހުއްޓުވުމަށް އަލަށް ފަށާފައިވާ މަސައްކަތުގެ ދަށުން، މާލެ އާއި ހުޅުމާލޭގައި ގޭންގްތައް ހަރަކާތްތެރިވާ ސަރަހައްދުތަކުގައި ސްޓެޓިކްކޮށް ފުލުހުން ތިބެގެން ބެލެހެއްޓުމުގެ މަސައްކަތް ފަށައިފިއެވެ.

ކޮމިޝަނަރ އޮފް ޕޮލިސް އަލީ ޝުޖާޢު ވިދާޅުވި ގޮތުގައި، މި މަސައްކަތަކީ ފުލުހުންގެ ސްޓްރެޓީޖިކް ޕްލޭން 2024-2028 ގައި ކަނޑައެޅިފައިވާ ގޭންގް ކުށްތައް ހުއްޓުވުމުގެ ލަނޑުދަނޑި ހާސިލް ކުރުމަށް ކުރެވޭ މަސައްކަތްތަކުގެ ތެރެއިން އެއް މަސައްކަތެވެ. މި މަޤްޞަދު ހާސިލުކުރުމަށްޓަކައި، ފުލުހުންގެ އޮނިގަނޑަށް ގެނެވުނު އެންމެ ފަހުގެ ބަދަލާއެކު ގޭންގް ކުށްތަކާ ދެކޮޅަށް މަސައްކަތް ކުރުމަށް ޚާއްޞަ ވިންގެއް ޤާއިމްކުރެވިފައިވާ ކަމަށް ސީޕީ ވިދާޅުވިއެވެ.

މިހާރު މިފަށާފައިވާ މަސައްކަތްތަކުގެ ތެރެއިން މާލެ އާއި ހުޅުމާލޭގައި ގޭންގްތައް ހަރަކާތްތެރިވާ ސަރަހައްދުތަކުގައި ސްޓެޓިކްކޮށް ފުލުހުން ތިބެގެން ބަލަހައްޓަމުން ގެންދާނެ.

ޢަލީ ޝުޖާޢު

މި އައު އިންތިޒާމުގެ ދަށުން، ގޭންގް ކުށްތަކާ ދެކޮޅަށް މަސައްކަތްކުރާ ބަހާއާއި މަސްތުވާތަކެއްޗާ ދެކޮޅަށް މަސައްކަތްކުރާ ބަހާގެ އިސް ފުލުހަކު ކޮމިއުނިކޭޝަން ސެންޓަރުގައި މަސައްކަތްކުރާނެ ކަމަށާ މިކަމުގެ ސަބަބުން މާލެ އާއި ހުޅުމާލޭގެ އާންންމު ހާލަތު ސީދާ މި ބަހާތަކުން މޮނިޓަރކޮށް، ދިމާވާ އެކިއެކި ކަންކަމަށް އަވަސް ފިޔަވަޅު އެޅުމަށް މަގުފަހިވެގެންދާނެ ކަން ޝުޖާޢު ފާހަގަކުރެއްވިއެވެ.

ކޮމިޝަނަރ ޝުޖާޢު އިތުރަށް ވިދާޅުވި ގޮތުގައި، މި މަސައްކަތަކީ މުޅި ފުލުހުންގެ މުއައްސަސާއިން ނިންމާފައިވާ ނިންމުމެއް ތަންފީޒުކުރުމަށް ކުރެވޭ މަސައްކަތެކެވެ. އަދި މި މަސައްކަތަށް ރައްޔިތުންގެ ފަރާތުން ލިބޭ ބިނާކުރަނިވި ޚިޔާލުތަކަކީ ފުލުހުން ބަލައިގަންނާނެ ކަމެއްކަމަށްވެސް ވިދާޅުވިއެވެ.

"މި މަސައްކަތުގެ އެންމެ މުހިންމު މަޤްޞަދަކީ ރައްޔިތުންނަށް ރައްކާތެރިކަމުގެ އިހުސާސް ފޯރުކޮށްދިނުމާއި، ފުލުހުންގެ ޚިދުމަތް ރައްޔިތުންނާ ވީހާވެސް ގާތުން ފޯރުކޮށްދިނުމެވެ. އަދި ހަމައެހެންމެ، އިންސާނީ ވަސީލަތްތަކުގެ ބޭނުން އެންމެ ފުރިހަމަ ގޮތުގައި ހިފުން،" ކޮމިޝަނަރ ޝުޖާޢު ވިދާޅުވިއެވެ.

އަތޮޅުތަކުގައިވެސް މި މޮޑެލް ތަންފީޒުކުރަމުންދާ ކަމަށާއި، ރައްޔިތުންނާއި ކައުންސިލްތަކުގެ ފަރާތުން ޕޮޒިޓިވް ފީޑްބެކް ލިބެމުންދާ ކަމަށް ކޮމިޝަނަރ ފާހަގަކުރެއްވިއެވެ.

"އަޅުގަނޑުމެންގެ އަމާޒަކީ މުޅި ރާއްޖެއަކީ އަމާން އަދި ރައްކާތެރި ތަނެއްގެ ގޮތުގައި ހެދުން. މި މަޤްޞަދު ހާސިލުކުރުމަށްޓަކައި ސަރުކާރުން ވެސް ފުލުހުންނަށް ގިނަ ވަސީލަތްތަކެއް ފޯރުކޮށްދެއްވަމުން ގެންދަވާ،" ޝުޖާއު ވިދާޅުވިއެވެ.

ކޮމިޝަނަރ ޝުޖާޢު އިތުރަށް ވިދާޅުވި ގޮތުގައި، އާންމުންނާއި ފުލުހުން ބައްދަލުވެ ހިނގާ މުޢާމަލާތްތައް މޮނިޓަރކޮށް ބަލަމުންދާ ކަމަށާއި، ރަނގަޅުކުރަންޖެހޭ ކަންކަން ރަނގަޅުކުރުމަށް ކުރަންޖެހޭ މަސައްކަތްތައް ކުރަމުންދާ ކަމަށާއި، އަދި އެކަމާ ގުޅޭ އިރުޝާދުތައް ދަނީ ދެމުންނެވެ.

"އަޅުގަނޑުމެންގެ އުންމީދަކީ މި ކުރާ މަސައްކަތުގެ ނަތީޖާ ކުރު މުއްދަތެއްގެ ތެރޭގައި އާންމު ރައްޔިތުންނަށް ފެނިގެން ދިއުމެވެ. އަދި ރައްޔިތުންނަށް އަމާންކަމާއި ރައްކާތެރިކަމުގެ އިހުސާސް އިތުރަށް ކުރެވިގެން ދިއުމެވެ،" ކޮމިޝަނަރ ޝުޖާޢު ވިދާޅުވިއެވެ.

މި އައު އިންތިޒާމުގެ ދަށުން ފުލުހުން ގޭންގްތައް ހަރަކާތްތެރިވާ ސަރަހައްދުތަކުގައި 24 ގަޑިއިރު ޑިއުޓީ އަދާކުރަމުން ގެންދާނެއެވެ. މި މަސައްކަތުގެ ސަބަބުން ގޭންގް ކުށްތައް މަދުވެ، މާލެ އާއި ހުޅުމާލޭގެ މަގުތަކުގެ ރައްކާތެރިކަން އިތުރުވެގެންދާނެ ކަމަށް ފުލުހުން އުންމީދުކުރެއެވެ.

މި މަސައްކަތްތައް މޮނިޓަރ ކޮށް ވިލަރެސް ކުރުމަށް ޒަމާނީ ކޮމިއުނިކޭޝަން ސެންޓަރެއް މާލެ އަދި ހުޅުމާލޭގައި ވަނީ ގާއިމް ކުރެވިފައި. ސީނިއާ ފުލުހަކު މި ސެންޓަރުގަ 24 ގަޑިއިރު ޑިއުޓީ ކުރަމުން ގެންދާނެ. މުޅި މާލޭގެ ސީސީޓީވީ ނިޒާމް ސެންޓްރަލީ މި ތަނުން ކޮންޓްރޯލްކޮށް މޮނިޓަރ ކުރަމުން ގެންދާނެ. ފުލުހުން ހަރަކާތެރިވަމުންދާ ސީދާ ސަރަހައްދު މި ސެންޓަރުން ވަގުތުން ބަލައިލެވޭނެ. އަދި އެ ފުލުހުންގެ މަސައްކަތްތަކަށް ބޭނުންވާ މައުލޫމާތު ޓެކްނޮލޮޖީގެ އެހީގައި މި ސެންޓަރުގައި ވަގުތުން އެއްކުރެވި އެނަލައިޒް ކުރެވެމުން ދާނެ.

ޢަލީ ޝުޖާޢު

ފާއިތުވި ދުވަސްތަކުގައި ގޭންގު ކުށްތައް ހުއްޓުވުމަށާއި މަސްތުވާތަކެއްޗާ ދެކޮޅަށް ގިނަ މަސައްކަތްތަކެއް ކުރެވިފައިވާ ކަމަށް ކޮމިޝަނަރ ޝުޖާޢު ވިދާޅުވިއެވެ.