ސިިވިލް ސާވިސް ކޮމިޝަނުގެ މެންބަރުން މަޖިލީހަށް ހާޒިރުކުރަނީ

މަޖިލީހުގެ މިނިވަން މުއައްސަސާތަކުގެ ކޮމިޓީން މިގޮތަށް ނިންމާފައި މިވަނީ އިދިކޮޅު ޕީޕީއެމުން އެގޮތަށް އެދިގެންނެވެ.

މައުލޫމާތު ލިބިފައިވާ ގޮތުގައި ޕީޕީއެމުން އެގޮތަށް އެދިފައި ވަނީ ޝަރުތު ހަމަނުވާ ބަޔަކު ސިވިލް ސާވިސްގެ އެކި މަގާމުތަކަށް ހަމަޖެއްސި ކަމަށް ދެކެވޭ ވާހަކަތަކާއި ގުޅިގެންނެވެ.

ސިވިލް ސާވިސް ކޮމިޝަނުގެ މެންބަރުން ހާޒިރު ކުރާނެ ތާރީޚެއް މިއަދުގެ ކޮމިޓީގައި ނިންމާފައި ނުވާއިރު މީގެ ކުރިން ފެނަކަ ކޯޕަރަޝަންގެ ވެރިން ވެސް ވަނީ މަޖިލީހަށް ހާޒިރުކޮށްފައެވެ.

ފެނަކައިގެ ވެރިން ހާޒިރު ކުރީ އެ ކުންފުނީގެ މުވައްޒަފުންތަކެއް ވަޒީފާއިން ވަކިކުރި ކަމަށް ބުނާ މައްސަލައެއްގައެވެ.

ސިވިލް ސާވިސް ކޮމިޝަނުގައި 5 މެންބަރުންނަކީ ކޮމިޝަންގެ ރައީސް ޑރ. އަލީ ޝަމީމާއި، ކޮމިޝަންގެ ނައިބު ރައީސް ޝަހީދު މުހައްމަދުގެ އިތުރުން މެންބަރު ފާތިމަތު އާމިރާއާއި އިބްރާހިމް ޝަހީގް އަދި ޒަކަރިއްޔާ ހުސައިނެވެ.