އަހަރުގެ ދެވަނަ ކުއާޓަރުގައި ބީއެމްއެލް އަށް ސާފު ފައިދާގެ ގޮތުގައި 448 މިލިއަން ރުފިޔާ ލިބިއްޖެ

ބޭންކް އޮފް މޯލްޑިވްސް (ބީއެމްއެލް) އަށް މި އަހަރުގެ ދެވަނަ ކުއާޓަރުގައި ސާފު ފައިދާގެ ގޮތުގައި 448 މިލިއަން ރުފިޔާ ލިބިއްޖެއެވެ.

މިކަން ހާމަކޮށް ބީއެމްއެލް އިން ބުނީ، މި ކުއާޓަރުގައި ބޭންކުގެ ހިންގުމުގެ ފައިދާގެ ގޮތުގައި 698 މިލިއަން ރުފިޔާ ލިބިފައިވާ ކަމަށާއި، މިއީ މިއަހަރުގެ ފުރަތަމަ ކުއާޓަރާއި އަޅާ ބަލާއިރު، ތިން އިންސައްތައިގެ ކުރިއެރުމެއް ކަމަށެވެ.

ބީއެމްއެލުން ބުނީ، މި އަހަރުގެ ފުރަތަމަ ކުއާޓަރުގައި  ބޭންކުން 2.8 ބިލިއަން ރުފިޔާގެ އައު ލޯނު އަމިއްލަ ފަރުދުންނާއި ވިޔަފާރިތަކަށް ދޫކޮށްފައި ކަމަށެވެ.

މި ކުއާޓަރުގައި ވިޔަފާރީގެ މައިގަނޑު ހުރިހާ ދާއިރާއަކުންވެސް ކުރިއެރުން ލިބިފައި ވާކަން ފާހަގަކުރަމުން ބީއެމްލް އިން ބުނީ، ބޭންކުގެ ރައުސްމާލު ވަނީ ގާނޫނުން ލާޒިމްކުރާ މިންވަރަށްވުރެ މަތީގައި ހިފެހެއްޓިފައި ކަމަށެވެ.

މި ކުއާޓަރ ނިމުނުއިރު، ޖުމްލަ އެސެޓުގެ އަދަދު 44.9 ބިލިއަން ރުފިޔާއަށް އަރާފައިވާ ކަމަށާއި، ކަސްޓަމަރުން ޑިޕޮސިޓް ކޮށްފައިވާ އަދަދަށް ބަލާއިރު 29.5 ބިލިއަން ރުފިޔާ ލިބިފައި ވާކަމަށެވެ.

މީގެ އިތުރުންވެސް ބީއެމްއެލް އިން ބުނީ، އިންފްލޭޝަނާ ގުޅިގެން އަންނަ ޕްރެޝަރުތަކާ އެކުވެސް ހިންގުމުގެ ހަރަދުތައް ހިފެހެއްޓިފައި ވާކަމަށާއި، ޕްރޮވިޝަން ކަވާ ކުރީ ހަރުދަނާ ކަމާއެކު 100 އިންސައްތައިގައި ކަމަށެވެ.

ހަމައެއާއިއެކު، މި ކުއާޓަރުގައި ޝަރުއީ ހަމަތަކަށް ފެތޭ ފުރަތަމަ ކްރެޑިޓް ކާޑު ރާޢްޖެއަށް ތައާރަފްކޮށްފައިވާ ކަމަށާއި،ގެދޮރު އިމާރާތް ކުރުމާއި މާރާމާތު ކުރުމަށް ކަސްޓަމަރުންގެ ޑިމާންޑަށް ބަަލައި ހޯމް ބިލްޑް އަދި ހޯމް އިކުއިޓީ ލޯނު ތާރަފްކޮށްފައި ވާކަން ވެސް ބީއެމްއެލުން ވަނީ ފާހަގަކޮށްފައެވެ. އަދި ދެމެހެއްޓެނިވި ޕްރޮޖެކްޓްތަކަށް އެހީތެރިކަން ފޯރުކޮށްދިނުމަށާއި ޖަމިއްޔާތައް ބާރުވެރިކޮށް މުޖްތަމައަށް އެހީވުމަށް ބޭންކުގެ ސީއެސްއާރު ހަރަކާތްތަކުގެ ތެރެއިން ނިމިދިޔަ ކުއާޓަރުގައި ވަނީ "ބޭންކް ފަންޑް" އަށް އެދި ހުށައެޅުމުގެ ފުރުސަތު ހުޅުވާލާފައި ކަމަށް ވެސް ބީއެމްއެލުން މައުލޫމާތު ދެއެވެ.

މުޅި ރާއްޖެ ހިމެނޭ ބޭންކިން ވިއުގަޔާއެކު 38 ބްރާންޗާއި ސާވިސް ސެންޓަރު، އަދި 86 ސެލްފް ސާވިސް ބޭންކިން ސެންޓަރުގެ އިތުރުން 144 އޭޓީއެމް އަދި ކޭޝް އެޖެންޓުންގެ އިތުރުން އެންމެ ޒަމާނީ އޮންލައިން ބޭންކިންގެ ޚިދުމަތް ފޯރުކޮށްދޭ ބީއެމްއެލް ގެ އަމާޒަކީ އަމިއްލަ ފަރުދުންނާއި ވިޔަފާރިތަކާ ރާއްޖޭގެ އެކި ކަންކޮޅުތަކަށް އެހީތެރިކަން ފޯރުކޮށްދިނުންކަމަށް އެ ބޭންކުން ބުނެއެވެ.