ބިން ހިއްކުމުގެ މަޝްރޫޢުތައް ޑިޒައިންކޮށްދޭނެ ފަރާތެއް ހޯދަން އިއުލާންކޮށްފި

17 ރަށެއްގެ ބިން ހިއްކުމުގެ މަޝްރޫއުތައް ޑިޒައިންކޮށްދޭނެ ފަރާތެއް ހޯދަން މިނިސްޓްރީ އޮފް ނެޝެނަލް ޕްލޭނިން އެންޑް އިންފްރާސްޓްރަކްޗަރ އިން އިއުލާންކޮށްފިއެވެ.

ބިން ހިއްކުމުގެ މަޝްރޫޢުތައް ކުރިއަށް ގެންދަން ހަމަޖެހިފައިވަނީ ހއ. އަތޮޅުގެ 2 ރަށަކާއި، ރ. އަތޮޅުގެ 2 ރަށަކާއި، ކ. އަތޮޅުގެ 3 ރަށެއް، އއ. އަތޮޅުގެ 2 ރަށެއް، ފ. އަތޮޅުގެ 2 ރަށެއް ގައެވެ.

އަދި މެދު ރާއްޖޭތެރޭގެ އަތޮޅުތަކުގެ ތެރެއިން ދ. އަތޮޅާއި ތ. އަތޮޅު އަދި ލ. އަތޮޅުގައި ވެސް ބިން ހިއްކުމުގެ މަޝްރޫޢު ކުރިއަށް ގެންދާނެއެވެ. ދެކުނުގެ އަތޮޅުތަކުގެ ތެރެއިން ބިން ހިއްކުމުގެ މަޝްރޫޢު ކުރިއަށް ގެންދަނީ ގއ، ގދ. އަތޮޅުގެ އިތުރުން އައްޑޫ ސިޓީގައެވެ.

މިނިސްޓްރީން ކުރި އިއުލާންގައި ބުނެފައިވަނީ 17 ރަށުގެ ބިން ހިއްކުމުގެ މަޝްރޫޢު ޑިޒައިންކުރުމާއި، މަސައްކަތަށް ބޭނުންވާ އެންވަޔަރަމަންޓް އިމްޕެކްޓް އެސެސްމަންޓް ރިޕޯޓް ތައްޔާރުކުރުމަށް ޝައުގުވެރިވާ ފަރާތްތަކަށް މަޢުލޫމާތުދިނުމަށް ބާއްވާ ބައްދަލުވުން އަންނަ އާދިއްތަ ދުވަހު އެ މިނިސްޓްރީގައި އޮންނާނެ ކަމަށެވެ.

އަދި މި މަސައްކަތާއި ބެހޭ ފައިނޭންޝަލް އަދި ޓެކްނިކަލް ޕްރޮޕޯސަލް ބިޑް ހުޅުވުން އޮންނަނީ އެޕްރީލް މަހުގެ 7ގައި އޮންނާނެ ކަމަށް ވެސް ވަނީ ބުނެފައެވެ.

މިއަހަރުގެ ބަޖެޓުގައި ބިން ހިއްކުމަށް 375 މިލިއަން ރުފިޔާ ކަނޑައަޅާފައި ވެއެވެ.