ސިޔާމްއާ ޒާރާގެ ކައިވެނި ސުލްހައިގައި ރޫޅާލައިފި

މަޝްހޫރު ވިޔަފާރިވެރިޔާ އަހްމަދު ސިޔާމް މުހައްމަދު އާއި އައިމިނަތު ޒާރާގެ ކައިވެނި ރޫޅާލައިފި އެވެ.

މުޅި ގައުމުގެ ސަމާލުކަން ހުއްޓުނު މި ކައިވެނި ރޫޅިފައިވާ ކަމަށް ސިޔާމްގެ އަރިސް ބޭފުޅެއް ކަމަށް ވެލިދޫ ދާއިރާގެ މެންބަރު މުހައްމަދު އައްބާސް ވަނީ ޔަގީން ކޮށް ދެއްވާފަ އެވެ.

އައްބާސް ވިދާޅުވީ ސިޔާމް އާއި ޒާރާގެ ކައިވެންޏަކީ އެކަކު އަނެކުން ދެކެ ލޯބި ވެގެން ކުރި ކައިވެންޏެއް ކަމަށެވެ. އެ ކައިވެނި ރޫޅާލާފައި ވަނީވެސް އެކަކު އަނެކުންގެ މެދުގައި ރިވެތި ގޮތުގައި މަސްވަރާކުރުމަށް ފަހު ސުލްހަވެރިކަމާއެކު ސުލްހަވެރި މާހައުލެއްގައި ކަމަށެވެ.

ސިޔާމްއާ ޒާރާގެ ކައިވެންޏަކީ ހުރިހާ ދިވެހީންގެ ސަމާލުކަން ހޯދި ކައިވެންޏެކެވެ. ކައިވެނީގެ ރަނާއި ކައިވެނި ހަފްލާއާ އެ ނޫން އެތައް ކަމަކާ ގުޅޭގޮތުން ބޮޑެތި ބަހުސްތައް ހިނގާފައިވެ އެވެ.

ޒާރާ ނިސްބަތްވާ ބ. ކަމަދޫގައި އީދު ހަރަކާތްތަކުން އޭނާ އާންމުންގެ ސަމާލު ކަމަށް އައިތާ ކުޑަ ދުވަސްކޮޅެއްގެ ތެރޭގައި ސިޔާމްއާ ޒާރާގެ ގުޅުމުގެ ވާހަކަތައް ދެކެވެން ފެށި އެވެ. އުމުރުން 23 އަހަރުގެ ޒާރާއާ 55 އަހަރުގެ ސިޔާމްގެ ކައިވެނި ކުރެވުނީ އޭގެ ދުވަސްކޮޅެއް ފަހުން މިދިޔަ އަހަރުގެ އޮކްޓޫބަރު މަހުގެ 10 ވަނަ ދުވަހު އެވެ.

އެ ކައިވެންޏާއި ގުޅިގެން ސިޔާމްގެ އެހީތެރިކަން މުޅި ކަމަދޫގެ ރައްޔިތުންނަށް ވެސް ލިބުނެވެ.