އިންޑިޔާ ސިފައިން ގެންދިއުން އަވަސްކުރަން އެ ޤައުމުން އެއްބަސްވެއްޖެ

މި ސަރުކާރުން އެންމެ ބޮޑަށް ބޭނުންވެފައިވާ ގޮތަށް މި ޤައުމުގައި ތިބި އިންޑިއާގެ ސިފައިން އަނބުރާ ގެންދިއުމުގެ މަސައްކަތް "ފާސްޓް ޓްރެކް" ގައި ކުރިއަށް ގެންދަން އިންޑިޔާއިން އެއްބަސްވެފައިވާ ކަމަށް ރާއްޖޭގެ ފޮރިން މިނިސްޓްރީން މިއަދު ބުނެފި އެވެ.

ރާއްޖޭގެ ފޮރިން މިނިސްޓްރީން މިހެން ބުނެފައިވަނީ އެ މިނިސްޓްރީން ނެރުނު ބަޔާނެއްގައެވެ.

އެ ބަޔާން ނެރެފައި މިވަނީ ރައީސް ޑރ. މުހައްމަދު މުއިއްޒާއި އިންޑިއާގެ ބޮޑުވަޒީރު ނަރެންދުރަ މޮދީ ދުބާއީގައި ބޭއްވެވި ބައްދަލުވުމުގައި އެއްބަސްވެވަޑައިގެންނެވި ގޮތަށް ދެ ޤައުމުގެ ދެމެދުގައި އުފައްދާފައިވާ "ހައި ލެވެލް ކޮމިޓީ" ގެ ބައްދަލުވުމެއް މިއަދު ބާއްވާފައި ވަނިކޮށެވެ.

މި ބައްދަލުވުމާއި ގުޅޭގޮތުން ފޮރިން މިނިސްޓްތީގެ ބަޔާނުގައި ވަނީ އެ މިނިސްޓްރީގައި މިއަދުގެ ހެނދުނުން ފެށިގެން ވަރަށް ގިނައިރު ވަންދެން ބޭއްވި ދެ ޤައުމުގެ މަތީ ފެންވަރުގެ ބޭފުޅުންގެ ބައްދަލުވުމުގައި ، އިންޑިއާގެ ސިފައިން ރާއްޖެ އިން ގެންދިއުމުގެ މަސައްކަތް "ފާސްޓް ޓްރެކް" ގައި ކުރިއަށް ގެންދަން ދެ ޤައުމުން ވެސް އެއްބަސްވުމަކަށް އާދެވިފައިވާ ކަމަށެވެ.

ފޮރިން މިނިސްޓރީގެ ބަޔާނުގައި ބުނެފައިވާ ގޮތުގައި މިއަދު ދެޤައުމުގެ ދެމެދުގައި ބޭއްވުނު ދެ ގައުމުގެ މަތީ ފެންވަރުގެ ބޭފުޅުންގެ ބައްދަލުވުމުގައި ރާއްޖެ އާއި އިންޑިއާގެ މަސްލަހަތު ހިމެނޭ ކަންކަމާ ގުޅޭ ގޮތުން ފުޅާދާއިރާއެއްގައި މަޝްވަރާ ކުރެވުނު ކަމަށާއި ގުޅުން އިތުރަށް ބަދަހި ކުރުމަށް ބޭނުންވާކަން، ދެ ގައުމުން ވެސް މިއަދުގެ ބައްދަލުވުމުގައި ހާމަކޮށްފައިވާ ކަމަށެވެ.

މިފަދަ ދެވަނަ ބައްދަލުވުމެއް ދެ ޤައުމަށް ފަސޭހަ ވަގުތެއްގައި ބޭއްވުމަށް މިއަދުގެ ބައްދަލުވުމުގައި ނިންމިފައިވާ ކަމަށް ވެސް ފޮރިން މިނިސްޓރީގެ ބަޔާނުގައި ބުނެފައިވެއެވެ.

މި ސަރުކާރު ވެރިކަމަށް އައުމަށް ދިވެހިން ގާތުގައި ވި އެންމެ ބޮޑު ވަޢުދަކީ ވެސް ރާއްޖޭގައި ތިބި އިންޑިޔާ ސިފައިން ރާއްޖެއިން ބޭލުމެވެ. ރައީސްޑރ. މުއިއްޒުގެ ވެރިކަމުގެ ފުރަތަމަ 100 ދުވަހުގެ ތެރޭގައި ކުރައްވަން އެ މަނިކުފާނު ނިންމަވާފައިވާ އެންމެ މުހިއްމު ކަމަކީވެސް ރާއްޖޭގައި ތިބި އިންޑިއާގެ ހުރިހާ ސިފައިން ރާއްޖެ އިން ބޭލުމެވެ.