ބިންވެރިޔާ ސްކީމުގެ ދަށުން ބިންދޫކުރިގޮތް އޭސީސީން ތަހުގީގުކުރަނީ

މިދިޔަ ސަރުކާރު ނިމެމުންދަނިކޮށް ރިޔާސީ އިންތިހާބަށް ބިންވެރިޔާ ސްކީމުގެ ދަށުން މާލޭ ރައްޔިތުންނަށް ދޫކުރި ގޯތިތައް ދޫކޮށްފައިވާގޮތް ބަލަމުން އަންނަ ކަމަށް އެންޓި ކޮރަޕްޝަންސް ކޮމިޝަން (އޭސީސީ) ބުނެފިއެވެ.

އޭސިސީން މިފަދައިން ބުނެފައިވަނީ ފަހިދިރިއުޅުން ކޯޕަރޭޝަނުން ހަދާ 4000 ފުލެޓާއި ގުޅިގެން އާއްމުގެ ފަރާތުން މަޖިލިހަށް ފޮނުވަފައިވާ ސިޓީއަކާއި ގުޅިގެން މައުލޫމާތު ސާފު ކުރުމަށް އޭސީސީގެ މެމްބަރުން މަޖިލިހުގެ މިނިވަން މުއައްސަސާތަކާއި ބެހޭ ކޮމިޓީއަށް ހާޒިރު ކުރުމުން ކޮމެޓީގެ މެމްބަރަކު ކުރި ސުވާލަކަށް ޖަވާބު ދެއްވަމުންނެވެ.

މިކޮމެޓީ ބައްދަލުވުމުގައި ބިންވެރިޔާ ސްކީމުގެ ދަށުން ގަވާއިދާއި ހިލާފަށް ގޯތި ދޫކުރި މައްސަލަ ލިބިފައިވޭތޯ ކޮމެޓީގެ މެމްބަރަކު ކުރެއްވި ސުވާލުގެ ޖަވާބުގައި  އޭސީސީގެ ރައީސް އާދަމް ޝާމިލް ވިދާޅުވީ ބިންވެރިޔާ ސްކީމާ ގުޅިގެން ވެސް މައްސަލަތަކެއް އޭސީސީ އަށް ހުށަހަޅާފައިވާ ކަމަށާއި އެ މައްސަލަ ތަހުގީގުކުރަމުން އަންނަ ކަމަށެވެ.

"އެކަމުގެ ތަހުގީގު ވެސް މިދަނީ ކުރަމުން. އެކަމަކު އެ ތަހުގީގުގައި ފާހަގަކުރެވުނު ކަންކަން މި ބައްދަލުވުމަށް ނެތް ގެނެވިފައެއް،" އޭސީސީގެ ރައީސް ޝާމިލް ވިދާޅުވި އެވެ.

ޝާމިލް އިތުރަށް ވިދާޅުވީ އެކަމާއި ގުޅޭ ތަފްސީލް މަޖިލިހުގެ ކޮމެޓީން ބޭނުންވެއްޖެ ހިދެއްގައި މަޖިލިހާއި ހިއްސާކުރައްވާނެ ކަމަށެވެ.

އޭސީސީން މިއަދު އެހެން ވިދާޅުވެފައިވާއިރު ބިންވެރިޔާ ސްކީމުގެ ދަށުން ދޫކޮށްފައިވާ ގޯތިތަކުގެ ލިޔުމާއި ރަޖިސްޓަރީތައް އޭގެ ހައްގުވެރި ފަރާތްތަކާއި ހަވާލުކުރުމުގެ މަސައްކަތް މި ސަރުކާރުން މިއަދު ވަނީ އަނެއްކާވެސް ފަށާފައެވެ. މިދިޔަ ސަރުކާރުންވެސް ވަނީއޭގެ ތެރެއިން ބައެއް ފަރާތްތަކަށް ގޯތި ލިބުނު ކަމުގެ ލިޔުން ހަވާލުކޮށްފައެވެ.

ނިމިދިޔަ ސަރުކާރުން ހިންގި ގެދޮރުވެރިޔާ ސްކީމުގެ ދަށުން ފުލެޓް ލިބުނު މީހުންގެ ތެރެއިން 60 އިންސައްތަ މީހުންނަކީ ފުލެޓް ލިބުގެ ސަރުތު ހަމަނުވާ މީހުންކަމަށް އޭސީސީން ކުރިއަށް ގެންދިޔަ ތަހްގީގަށް ފަހު އެކޮމިޝަނުން ވަނީ ހާމަކުރައްވާފައެވެ. އަދި އެކަންތައް ވެސް އިތުރަށް ބަލަމުން ގެންދާކަމަށް އޭސީސީން ހާމަކުރައްވައެވެ.