ހުޅުމާލޭގެ މުނިސިޕަލް ކަންކަމާ ކައުންސިލުން ހަވާލެއް ނުވި: ރައީސް
ލިޔުންތެރިޔާ
އަހުމަދު ހަމީދު އާދަމް
ހުޅުމާލޭގެ މުނިސިޕަލް ކަންކަމާ މާލެ ސިޓީ ކައުންސިލުން ހަވާލުނުވި ކަަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިރޭ ވިދާޅުވެއްޖެ އެވެ.
ހުޅުމާލޭގެ މުނިސިޕަލް ކަން މާލެ ސިޓީ ކައުންސިލާއި ހަވާލުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވައުދުފުޅެކެވެ. ނަމަވެސް އެކަން އަދި އޮތީ ނުވެ އެވެ.
މިރޭ އޮތް ރައްޔިތުންގެ ބައްދަލްވުމުގައި އާންމުންގެ މީހަކު ވަނީ އެކަމާއި ގުޅޭގޮތުން ސުވާލުކޮށްފަ އެވެ. އެ ސުވާލަށް ޖަވާބު ދެއްވަމުން ރައީސް ވިދާޅުވީ ހުޅުމާލޭގެ މުނިސިޕަލް ކަން މާލެ ސިޓީ ކައުންސިލާއި ހަވާލުކުރުމަކީ ވެވަޑައިގެންނެވި ވައުދެއް ކަމަށެވެ. އެކަމަށް މަސައްކަތް ވެސް ކުރައްވާފައިވާ ކަމަށް ވިދާޅުވި އެވެ.
އަދި ކެބިނެޓުން ނިންމަން ޖެހޭ ކަންކަން ނިންމާ ސަރުކާރުން ކުރަން ޖެހޭ ހުރިހާ ކަމެއް ކޮށްފައިވާ ކަމަށް ވިދާޅުވި އެވެ. ނަމަވެސް ހުޅުމާލޭގެ މުނިސިޕަލް ކަންކަމާ މާލެ ސިޓީ ކައުންސިލުން ހަވާލުނުވި ކަމަށް ވިދާޅުވި އެވެ. ރައީސް ވިދާޅުވީ ހުރިހާ ކަމަކާ ހަވާލުވާން ކައުންސިލުން ދެކޮޅު ހެދި ކަމަށެވެ.
"އެހެން ނަމަވެސް ކައުންސިލުން އެކަމަށް އެ ރެސްޕޮންސިބިލިޓީ ނަގަން ބޭނުންނުވާތީ ނުވަތަ ތައްޔާރުނުވާތީ ކަމަށް ވެދާނެ ހަވާލުނުވެ އޮތީމަ އެކަން ނުފުއްދި އެ އޮތީ. އެހެންވީމަ އަޅުގަނޑުގެ ވަޢުދުފުއްދަން މިހުރީ ރެޑީގައި މިހާރު ވެސް," ރައީސް ވިދާޅުވި އެވެ.
އަދި އެމަނިކުފާނުގެ އިލްތިމާސް އަކީ ކައުންސިލްގެ ނިންމުން ބަދަލު ކުރުން ކަމަށެވެ. ވެވަޑައިގެންނެވި ވައުދު ފުއްދެވުމަށް އެމަނިކުފާނު ހުންނެވީ ތައްޔާރަށް ކަަމަށް ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
