ފެނަކައިގެ އެމްޑީ ސައީދަކީ ރޯނު އެދުރެއް: ނިމާލް
ފެނަކަ ކޯޕަރޭޝަންގެ މެނޭޖިންގ ޑިރެކްޓަރކަމުގެ މަގާމުގައި މިހާރު ހުންނެވި މުހައްމަދު ސައީދަކީ ރޯނުއެދުރެއްކަމަށް އެ ކުންފުނީގެ އެމްޑީކަން ކުރިން ކުރެއްވި އަދި މިހާރު ޕީއެންސީގެ ނައިބު ރައީސްކަން ކުރައްވަމުން ގެންދަވާ މުހައްމަދު ނިމާލް ވިދާޅުވެއްޖެއެވެ.
ނިމާލް މިހެން ވިދާޅުވީ ސައީދަށް ބައިނަލްއަގްވާމީ އެވޯޑެއް ލިބުމުން އެކަމަށް ރައްދުދެއްވައި، ފޭސްބުކްގައި އާންމުކުރެއްވި ސްޓޭޓަސްއެއްގައެވެ.
އެބޭފުޅާ ވިދާޅުވީ ފެނަކައިގެ އެތައް މުވައްޒަފުން އެއްވެސް ކުށަކާ ނުލާ ވަޒީފާ އިން ވަކިކޮށް އެ މުވައްޒަފުންނާއި އެމީހުންގެ އާއިލާތައް މަގުމަތި ކުރުވާ، އެ މުވައްޒަފުންނަށް ނިކަމެތި ކަންދީ، ވަޒީފާ ގައި މިހާރު ދެމިތިބި ފަރާތްތައް ސައީދު ހިންގަވާ ކޮރަޕްޝަންގެ އަމަލުތަކަށް އެއްބާރުލުން ނުދޭކަމުގައި ވާނަމަ ވަޒީފާ ގައި ދެމި ނުތިބެވޭނެ ކަމުގެ ބިރުވެރިކަން އުފައްދާފައިވާ ކަމަށެވެ.
އަދި އެފަދަ މާހައުލެއް ޤާއިމުކުރި ބޭފުޅަކަށް ބައިނަލް އަޤްޥާމީ އެވޯޑެއް ލިބުމުން ދިވެހިން ތެރޭގައި ތިބި މަދު ބަޔަކު އަތްޖެހިޔަސް ދެން ތިބި މީހުން ގާތަށް އަންނާނީ ހިނިކަަމަށް ނިމާލް ވިދާޅުވިއެވެ.
ނިމާލް ވިދާޅުވީ މި އަހަރުގެ ފުރަތަމަ ދެ ކުއާޓާގައި ކުންފުނި ހިންގުމަށް ބޮޑެތި ބަދަލު ތަކެއް ގެނެސް ހަރަދުތަށް ކުޑަކޮށް ފައިދާ އިތުރު ވެފައި ކަމަށް ސައީދު ވިދާޅުވި އިރު މީގެ ކުރިން އެބޭފުޅާ ދެއްވާ ކޮންމެ ބަސްދީގަތުމެއްގައި ކުންފުނި ދަރާފައި އޮތް މިންވަރާއި ކުންފުނީގައި އޮތް ދޯހަޅި ސިޔާސަތުތަކުގެ ސަބަބުން ކުރިއަށް ވަޑައިގެން ނެތީ ކަމަށް ބަހަނާ ދައްކަވާ، ރަށްރަށުން ކަރަންޓު އެހާ ގިނައިން ދާންޖެހޭ ސަބަބަކީ އައީ ކަމަށް ދިވެހި ރައްޔިތުނަށް ވިސްނުވާ ދޭން މަސަކަތްވެސް ކުރެއްވީކަމަށެވެ.
"އޭޝިޔަން ޔުޓިލިޓީސް އެވޯޑް ދޭ ފަރާތުން މަނިކުފާނުގެ މަސައްކަތްޕުޅު ކޮންމެ ދުވަހަކުވެސް ވަރަށް ގާތުން ބައްލަވާ އިވެލުއޭޓް ކުރައްވަނީ ތޯއެވެ. އެ ބޭފުޅުން ކުރަށްވާނެ އިތުރު މަސައްކަތެއް ނެތީ ތޯއެވެ. މި ހުރިހާ ކަމެއް ބަދަލުކުރައްވާ މަނިކުފާނު އެއް ދުވަހުން ތިޔަ ގެންނެވި ބޮޑު ބަދަލަށް އެވޯޑެއް އެރުވުމުން މިއަދު މަނިކުފާނު ސިފަ ކުރަން މި ޖެހެނީ ޖާދޫ ގަރެއްގެ ގޮތުގައެވެ"، ނިމާލް ވިދާޅުވިއެވެ.
ނިމާލް ވިދާޅުވީ ސައީދަށް ލިބިވަޑައިގެންނެވި އެވޯޑަކީ ގަނެވޭ އެއްޗެއްކަމަށާއި ނިމާލް އެމްޑީ ކަމުގައި ހުންނެވިއިރުވެސް އެފަދަ ހުށައެޅުންތައް އަންނަ ކަމަށެވެ. އަދި އެ އެވޯޑް ހޯދުމަށް ރައްޔިތުންގެ ޓެކްސް ފައިސާއިން ފެނަކައިން ހަރަދުކުރި މިންވަރު ހާމަކުރުމަށްވެސް އެބޭފުޅާ ވަނީ ގޮވާލައްވާފައެވެ.
" އެހެން ބަޔަކު ކޮށްނިންމާފައި ހުރި ބުރަ މަސައްކަތެއްގެ މެޑަލް ޖަހަން ލަދެއް ނުގަނޭތޯއެވެ. ތިޔަ ކުރެއްވި ކަމަކީ އެހެން މީހަކު ލައްވައި އެކްޒާމެއް ހަދުވައިގެން ވަގު ސެޓްފިކެޓެއް ހޯދުން ކަހަލަ ކަމެކެވެ. މަނިކުފާނަކީ މަޤާމް ގައި ދެމިހުރުމަށް މަކަރާ ޖާދޫ ހައްދަވާ މޮޅު ރޯނު އެދުރެކެވެ. ތިޔައީ ދިވެހި ކޮމެޑީ ފިލްމް އަކަށް މރ.ބީންގެ ރޯލަކަށް ނޭގޭނެ އެންމެ މޮޅު އެކްޓަރެވެ"، ނިންމާލައްވަމުން ނިމާލް ވިދާޅުވިއެވެ.
ފޮޓޯ: މިހާރު
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
