ތެލެސީމިއާ އާއިލާގެ ކަންބޮޑުވުންތައް: ރައީސް ވަޑައިގެން ވަގުތުން އަޅުއްވަން ފެއްޓެވީ ހަރުދަނާ ފިޔަވަޅުތަކެއް

ތެލެސީމިއާ މީހުންނާއި ކުދީންގެ އާއިލާތަކުގެ ކަންބޮޑުވުންތަކާއި ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވަނީ ތެލެސީމިއާ ސެންޓަރަށް ޒިޔާރަތް ކުރައްވާފަ އެވެ. އެ ޒިޔާރަތުގައި އެމަނިކުފާނު ވަނީ ތަނުގެ ހާލަތު ބައްލަވާލައްވާފަ އެވެ. އެ ވަގުތު ހިދުމަތް ހޯދަން އައިސް ތިބި ތެލެސީމިއާ މީހުންނާއި ކުދީންނާއި ބައްދަލުކޮށް ކަންބޮޑުވުންތައް އަޑުއެއްސެވި އެވެ. އަދި އާއިލާތަކާއި ބައްދަލު ކުރައްވާ އެ މީހުންގެ ޝަކުވާތައް ވެސް އަޑުއެއްސެވި އެވެ.

އަދި އެ ކަންބޮޑުވުންތައް ހައްލު ކުރެއްވުމުގެ މަސައްކަތް ވަގުތުން ފެއްޓެވި އެވެ. އެމަނިކުފާނު ވިދާޅުވި ގޮތުގައި އެ މަސައްކަތް ކުރިއަށް ގެންދަވާނީ ސީދާ އެމަނިކުފާނުގެ ބެއްލެވުމުގެ ދަށުންނެވެ.

އެންމެ މުހިންމު ފިޔަވަޅުތަކެއްގެ ގޮތުގައި މިއަދު ނިންމެވީ މޯލްޑިވްސް ބްލަަޑް ސާވިސް އިން ހިދުމަތްދޭ ގަޑިތަކަށް ބަދަލު ގެންނެވުމެވެ. އެ ގޮތުން ހޮސްޕިޓަލްތަކެކޭ އެއް ހަމައަކަށް ތެލެސީމިއާ ސެންޓަރުން ވެސް ހިދުމަތް ދޭން ނިންމާ އެ މިންވަރަށް ވަގުތު އިތުރު ކުރެއްވި އެވެ.

ތެލެސީމިއާ ސެންޓަރުގައި ޑިރެކްޓަރު ޖެނެރަލް އެއް ނެތްތާ އެތައް ދުވަހެއް ވެއްޖެ އެވެ. އެއީ ކަންކަން ބޮއްސުންލައިގެން ދާން މެދުވެރިވީ ސަބަބެއް ކަމަށް ގިނަ ބަޔަކު ދެކެ އެވެ.

އެހެން ކަމުން އެ ސެންޓަރަކަށް ޑިރެކްޓަރު ޖެނެރަލްގެ މަގާމަަށް ބޭފުޅަކު ހަމަޖެއްސުމުގެ މަސައްކަތް ވަނީ ފައްޓަވާފަ އެވެ.

މީގެ އިތުރުން ހިދުމަތްތައް ރަނގަޅު ކުރުމަށް އެތެރޭގެ ހިންގުން ރަނގަޅު ކުރަން ޖެހޭކަން އެނގިވަޑައިގެންފައިވާ ކަމަށް ރައީސް ވިދާޅުވި އެވެ. ރައީސް ވަނީ އެ ބަދަލު ވެސް ގެންނަވަން ނިންމަވާފަ އެވެ.

މިއީ ތެލެސީމިއާ އާއިލާ އިން އެކަމަށް އެދޭތާ އަހަރުތަކެއް ވެފައިވާ ކަމެކެވެ.

މީގެ އިތުރުން މިހާރު ދިމާވެފައިވާ ފިލްޓާގެ މައްސަލަ ހައްލު ކުރުމަށް އަވަސް ފިޔަވަޅުތަކެއް އެޅުމަށް ރައީސް ވަނީ އަންގަވާފަ އެވެ. އެ މައްސަލަތައް ދެން ތަކުރާރު ނުވާނެ ގޮތްތައް ވެސް ސީދާ އެމަނިކުފާނު ވަނީ މެނޭޖްމަންޓަށް ވިދާޅުވެ ދެއްވާފަ އެވެ.

އަދި ތެލެސީމިއާ ކުދީންނާއި މީހުންނަށް ހިދުމަތް ދިނުމަށް ފިޒިޝަނުން ހަމަޖެއްސުމާއި ތެލެސީމިއާ ސެންޓަރު ހިންގާ އިމާރާތަކީ ބާވެފައިވާ އިމާރާތަކަށް ވުމުން އާ އިމާރާތަކަށް ހިދުމަތްތައް ބަދަލު ކުރުމުގެ މަސައްކަތްތައް ފެށުމަށް ވެސް ވަނީ ނިންމަވާފަ އެވެ.

ރައީސްގެ މި އަވަސް ފިޔަވަޅުތަކާ އެކު ހައްލެއް ނުލިބި ދިގުލައިގެން ގޮސްފައިވާ ތެލެސީމިއާ ކުދީންނާއި މީހުންގެ ކަންބޮޑުވުންތަކަށް ވަރަށް އަވަހަށް ހައްލުތަކެއް ލިބިގެންދާނެ ކަމަށް ބެލެވެ އެވެ.