މިދިޔަ 2 އަހަރުގެ ތެރޭ އަތުލައިގަތް މަސްތުވާތަކެތީގެ އަގު 277 މިލިއަން ރުފިޔާއަށް އަރާ: ކަސްޓަމްސް

ފާއިތުވެދިޔަ 2 އަހަރުގެ ތެރޭގައި ކަނޑާއި ވައިގެމަގުން އަތުލައިގަތް މަސްތުވާތަކެތީގެ އަގު 277 މިލިއަން ރުފިޔާއަށް އަރާކަމަށް މޯލްޑިވްސް ކަސްޓަމްސް ސާވިސްއިން ހާމަކޮށްފިއެވެ.

ދާޚިލީ ސަލާމަތާއި ފަންނިއްޔާތާބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮމިޝަނަރ ޖެނެރަލް އޮފް ކަސްޓަމްސް ފާތިމަތު ދިޔާނާ ވިދާޅުވީ، ވޭތުވެދިޔަ 2 އަހަރުގެ ތެރޭގައި ކަނޑުގެ މަގުންނާއި ވައިގެ މަގުން ރާއްޖެ އެތެރެކުރާ މުދަލަށް އަމާޒުކޮށްގެން 40،000 އޮޕަރޭޝަން ހިންގިފައިވާކަމަށެވެ.

މި އޮޕަރޭޝަންތަކުގައި 37 އުޅަނދު ޗެކުކޮށް، އެ މުއްދަތުގެ ތެރޭގައި ޖުމުލަ 205 ކިލޯގެ މަސްތުވާތަކެތި އަތުލައިގަނެވިފައި ވާކަމަށް ވިދާޅުވިއެވެ. މަގުމަތީ އަގުނަމަ އެތަކެތީގެ އަގު 277 މިލިއަން ރުފިޔާއަށް އަރާނެކަމަށް ލަފާކުރެވޭ ކަމަށް އޭނާ ވިދާޅުވިއެވެ.

މީގެ އިތުރުން، ރާއްޖެއަށް ވޭޕް އެތެރެކުރުން މަނާކުރިފަހުން މިއަދާ ހަމަޔަށް 185 މައްސަލައެއްގައި 73،000 އަށް ވުރެގިނަ ވޭޕް އަތުލައިގަނެފައިވާކަން އޭނާ ވަނީ ފާހަގަކުރައްވާފައެވެ. އަދި އެ މުއްދަތުގެ ތެރޭގައި ސިއްރުން ރާއްޖެ އެތެރެކުރަން އުޅުނު 24 މިލިއަނަށްވުރެ ގިނަ ސިނގިރޭޓް ސްޓިކް އަތުލައިގަނެފިފައިވާކަމަށްވެސް ކަސްޓަމުސްއިން ވަނީ ބުނެފައެވެ.

ދިވެހިރާއްޖެއަށް އެތެރެކުރާ  މުދަލުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ކަސްޓަމްސްއިން ދަނީ މުހިންމު އެތައް މަސައްކަތްތަކެއް ކުރަމުންނެވެ.