ފުވައްމުލަކުގައި އޮތް ފުޓުބޯޅަ މުބާރާތެއްގެ ތެރެއިން ރެފްރީއަށް ހަމަލާދިން ސަޕޯޓަރަކު ހައްޔަރުކޮށްފި

ފުވައްމުލައް ސިޓީ ކައުންސިލް ފުޓްސަލް މުބާރާތުގެ މެޗެއް ކުރިއަށް ދަނިކޮށް މެޗުގެ ރެފްރީކަން ކުރަން ހުރި މީހާއަށް ހަމަލާދިން ސަޕޯޓަރަކު ހައްޔަރުކޮށްފިއެވެ.

ފުލުހުން ބުނީ، އެ މައްސަލައިގައި ހައްޔަރުކޮށްފައިވަނީ އުމުރުން 34 އަހަރުގެ ފިރިހެނެއް ކަމަށާއި، މި މައްސަލަ އިތުރަށް ތަހުގީގު ކުރަމުން އަންނަ ކަމަށެވެ.

މާލެގަން ސްޕޯޓްސް ކްލަބާއި ސައުތު ސައިޑް ސްޕޯޓްސް ކްލަބް (މާދަޑު) ޓީމު ކުޅުނު ސެމީ ފައިނަލް މެޗު ކުރިއަށް ދަނިކޮށް، ކުއްލިއަކަށް ދަނޑު ބޭރުން މީހަކު ދުވެފައި އައިސް ފުންމައިގެން އަރައި ރެފްރީގެ ބުރަކަށީގައި ކޮޅުފައިން ޖަހާ މަންޒަރު ފެންނަ ވީޑިއޯއެއް ދަނީ ސޯޝަލް މީޑިއާގައި ދައުރުވަމުންނެވެ.

އެ ވީޑިއޯއިން ފެންނަ ގޮތުގައި، ކުޅުންތެރިޔަކަށް އަނިޔާވެގެން ފަރުވާދޭ ތަނުގައި ރެފްރީ ހުއްޓާ އެމީހާ ދަނޑަށް އަރައި ދިން ހަމަލާއާއިއެކު ރެފްރީ ގޮސް ޖެހުނީ އެތަނުގައި ހުރީ އެހެން ކުޅުންތެރިއެއްގެ ގައިގަ އެވެ. އެއާއިއެކު، އެ ކުޅުންތެރިޔާގެ ބޮލަށް ތަދުވެ އަތްއަޅައިގެން އޮންނަ ތަން ފެނެ އެވެ.

އެ ހަމަލައާ ގުޅިގެން މެޗު މެދުކަނޑާލުމަށް ފަހު އެހެން ރެފްރީއެއް އަރުވައިގެން މެޗު ފަށާފައިވާއިރު، ކުޅުންތެރިޔާއަށާއި، ރެފްރީއަށް ލިބުނު އަނިޔާގެ ތަފްސީލު ހާމަކޮށްފައެއް ނުވެއެވެ.