ތާޖު ރިސޯޓުންނާއި އެހީ ޖަމިއްޔާ ގުޅިގެން 600 ރޯދަވީއްލުން އެކި ފަރާތްތަކަށް ބަހައިފި

ތާޖު ރިސޯޓުންނާއި އެހީ ޖަމިއްޔާ ގުޅިގެން 600 ރޯދަވީއްލުން އެކި ފަރާތްތަކަށް ބަހައިފިއެވެ.

މިކަމާ ގުޅޭގޮތުން އެހީ ޖަމިއްޔާގެ ފަރާތުން ވޮއިސް އަށް މައުލޫމާތުދެމުން ބުނެފައިވަނީ، ތާޖު ރިސޯޓުން ވޮލުންޓަރީ ޕްރޮގްރާމެއްގެ ދަށުން 600 ރޯދަވީއްލުމުގެ ޕެކޭޖް އެކި ސަރަހައްދުތަކުގައި ބަހަދިނުމުގެ އިންތިޒާމް ހަމަޖެއްސުމަށް އެހީ ޖަމިއްޔާއަށް އެދުނުކަމަށެވެ. އެހެންކަމުން، އެދިފައިވާ ގޮތަށް އެ ޕެކޭޖުތައް ބަހާލައިފާ ކަމަށްވެސް އެޖަމިއްޔާއިން ވަނީ ބުނެފައެވެ.

އެ ޖަމިއްޔާއިން ބުނިގޮތުގައި، ޖުމްލަ ތިން ތަނެއްގައި މި ހަރަކާތްތައް ކުރިއަށް ގެންދިޔައެވެ. އެގޮތުން، ސަލްމާން މިސްކިތާއި، އައިޖީއެމްއެޗް އަދި މާރުކޭޓު ދޯނި ސަރަހައްދުތަކުގައި ތިބޭ ފަރާތްތަކަށް މި ރޯއްދަވީއްލުމުގެ ޕެކޭޖެ ފޯރުކޮށްދިނުމުގެ އިންތިޒާމު ހަމަޖައްސައިދީފައި ވާނެކަމަށް އެޖަމިއްޔާއިން ވަނީ ބުނެފައެވެ.

މިކަހަލަ ކަންކަމަކީވެސް، ކުންފުނިތަކުންވެސް ހަމަ ސީއެސްއާރުގެ ތެރެއިންނާއި މުވައްޒަފުން އިންވޯލްވު ކުރަން، ކޮމިއުނިޓީ ކަންކަމުގައި އިންވޯލްވް ކުރަން ވަރަށް ރަނގަޅު ކަންކަން. ތާޖު ރިސޯޓުން އެނެންގެވި އިނީޝީއޭޓިވް އަކީ މިކަން ކުރެވިދާނެ ވަރަށް ފުރިހަމަ ގޮތެއް.

އިގުބާލް، އެހީ ޖަމިއްޔާ

އެހީ ޖަމިއްޔާއިން އިތުރަށް ބުނި ގޮތުގައި، މިކަންތައް މެދުނުކެނޑި އަބަދުވެސް ކުރިއަށް ދިޔުމަށް އެދޭކަމަށާއި، މުވައްޒަފުންނާއި ކުންފުނީގެ ތެރެއިންވެސް މިކަމުގައި ބައިވެރިވާ މީހުން މިކަމަށް ޝައުގު ހުރެގެން ބައިވެރިވުމަށް އެޖަމިއްޔާއިން ވަނީ އެދިފައެވެ.

އެހީ ޖަމިއްޔާއިން ބުނީ، މިފަހަރުގެ އިފްތާރު ޕެކޭޖެއްގެ އަގަކީ 45 ރުފިޔާ ކަމަށެވެ. އެގޮތުން އިފްތާރު ޕެކޭޖަށް ފައިސާ މެދުވެރިކޮށް އެހީވާން ބޭނުންވާ ފަރާތްތަކުން އަންނަނިވި އެކައުންޓަށް ފައިސާ ޖަމާކުރުމަށް އެދިފައިވެއެވެ.

އެކައުންޓް: 7770000014820

ނަން: EHEE JAMIYYA

ބޭންކް: BML ISLAMIC

"އެހީ ޖަމިއްޔާ"ގެ ފަރާތުން ރަމަޟާން މަހާއި ދިމާކޮށް ކުރިއަށްގެންދާ "އެހީ އިފްޠާރް" ސުފުރާއަށް ތަކެއްޗާއި ފައިސާގެ އެހީތެރިކަން ފޯރުކޮށްދިނުމުގެ ފުރުޞަތު ހުޅުވާލުމުގެ އިތުރުން، ޑޮނޭޓް ކޮށްގެންނާއި އަދި ތަކެތި ހަދިޔާކޮށްގެންވެސް ބައިވެރިވެވޭނެ ކަމަށް އެޖަމިއްޔާއިން ވަނީ ބުނެފައެވެ.

އެހީ ޖަމިއްޔާއިން އިތުރަށް ބުނީ، އިފްޠާރު ޕްރޮގްރާމް މާލޭގެ އިތުރުން ރާއްޖޭގެ ބައެއް އެހެން ރަށްރަށުގައިވެސް ކުރިއަށްގެންދިއުމުގެ ފުރުސަތު ހުޅުވާލެވިފައި އޮތްކަމަށެވެ. އެގޮތުން މިދިޔަ އަހަރުވެސް 9 ރަށެއްގައި 25 މިސްކިތެއްގައި އެ ޕްރޮގްރާމް ކުރިއަށް ގެންގޮސްފައިވާއިރު، 21,000 އެއްހާ ޕެކޭޖް ބަހާފައިވާ ކަމަށް އެޖަމިއްޔާއިން މައުލޫމާތު ދެއެވެ.

އަދި މި އަހަރުވެސް ރަށް ރަށުގައި އިފްތާރު ޕެކޭޖު ބެހުމުގެ ފުރުސަތު ހުޅުވާލެވިފައިވާ އިރު، އެކަމާއި ގުޅޭ އިތުރު މައުލޫމާތު ބޭނުންނަމަ، 7803433 ނަމްބަރުން އެމައުލޫމާތު ލިބޭނެ ކަމަށާއި ތަކެތި ހަދިޔާ ކުރަން ބޭނުންވާ ނަމަވެސް އެނަމްބަރަށް ގުޅައިގެން އެކަން ހަމަޖެހޭނެ ކަމަށްވެސް އެޖަމިއްޔާއިން ބުނެފައިވެއެވެ.

ރޯދަ ވެރިޔަކަށް ރޯދަ ވިއްލާނެ ފަދަ ޞަދަޤާތް ކުރުން ނުވަތަ ރޯދަ ވީއްލުން ދިނުމަކީ އެކަމުގެ ޘަވާބާއި ދަރުމަ ހުރި ކަމަކެވެ.