އަލީ ރަމީޒުގެ "މަންފާ" އިން ކުޅިވަރު އެކަޑަމީއެއް، އަމާޒަކީ ދީނީ މިންގަނޑުގެ ތެރެއިން ކުޅިވަރު ކުރިއެރުވުން

ދީނީ ހޭލުންތެރިކަން އިތުރުކުރުމާއި ދީނީ އެކި މަސައްކަތްތަކުގައި ވަރަށް އިސް ދައުރެއް އަދާކުރަމުންދާ އަލީ ރަމީޒުގެ "މަންފާ" ޖަމިއްޔާ އިން ކުޅިވަރު އެކަޑަމީއެއް އުފައްދަން ނިންމާ އެ މަސައްކަތް ފަށައިފި އެެވެ.

ދިވެހި ފުޓްބޯޅައިގެ ލެޖެންޑް އަލީ އަޝްފާގު އާއި ވޮލީބޯޅަ ކޯޗު މުހައްމަދު ސާޖިދު (ކާއްޓޭ) އަދި ފުޓްބޯޅަ ކޯޗު އަލީ ނިސްތާރު މުހައްމަދު އާއެކު ރޭ ބޭއްވި ބައްދަލްވުމަކަށް ފަހު އެ ބޭފުޅުންނާއެކު ނަގާފައިވާ ފޮޓޯއެއް އަލީ ރަމީޒު ވަނީ ހިއްސާކޮށްފަ އެވެ.

އަދި ވިދާޅުވީ އޭނާގެ މަންފާ ޖަމިއްޔާ އިން ކުޅިވަރު އެކަޑަމީއެއް އުފެއްދުމުގެ މަސައްކަތް ފަށާފައިވާ ކަމަށެވެ.

އަލީ ވިދާޅުވި ގޮތުގައި އެ މަސައްކަތުގައި އިސްކޮށް ހުންނާނީ ކޯޗް ސާޖިދު އެވެ. ސާޖިދު ވިދާޅުވީ އެ އެކަޑަމީ ވެގެން ދާނީ ދީނީ މިންގަނޑުގެ ތެރޭގައި ރާއްޖޭގައި ކުޅިވަރު ކުރިއެރުވުމަށް މަސައްކަތް ކުރާނެ އެކަޑަމީ އަކަށެވެ.

އަދި ހުރިހާ ކުޅިވަރުތަކަށް ވެސް އެކަޑަމީން ފޯކަސް ކުރާނެ ކަމަށް ވިދާޅުވި އެވެ. ނަމަވެސް ފުރަތަމަ ފަށައި ގަންނާނީ ދިވެހީންގެ މެދުގައި އެންމެ ބޮޑު ޝައުގުވެރިކަމެއް އޮތް ތިން ކުޅިވަރު ކަމަށްވާ ފުޓްބޯޅަ އާއި ވޮލީ ބޯޅަ އަދި ފުޓްސެލް އިންނެވެ.

މަންފާ އަކީ ދާދި ފަހުން އުފެއްދި ޖަމިއްޔާ އެކެވެ. ނަމަވެސް މިދިޔަ ކުރު މުއްދަތުގެ ތެރޭގައި އެ ޖަމިއްޔާ އިން ވަނީ މުހިންމު ގިނަ މަސައްކަތްތަކެއް ކޮށްފަ އެވެ.