ހުޅުމާލޭގައި ހިނގި ނުރައްކާތެރި އެކްސިޑެންޓް: ކާރު ދުއްވި މީހާގެ ބަންދު އަމުރު ބާޠިލުކޮށްފި

މިދިޔަ ޖުލައި މަހުގެ 31 ވަނަ ދުވަހު ހުޅުމާލޭ 2 ގައި ހިނގި ނުރައްކާތެރި އެކްސިޑެންޓާ ގުޅިގެން ހައްޔަރުކުރެވުނު ކާރު ދުއްވި ފަރާތް، އިބްރާހިމް އިކްރާމް، ޝަރީޢަތް ނިމެންދެން ބަންދުގައި ބެހެއްޓުމަށް ނެރުނު އަމުރު ހައިކޯޓުން ވަނީ ބާޠިލުކޮށްފައެވެ. މި އަމުރު ބާޠިލުކުރީ އިކްރާމަށް ވަކީލެއްގެ އެހީތެރިކަން ނުލިބޭ ގޮތަށް އަމުރު ނެރެފައިވާތީއެވެ.

އެކްސިޑެންޓު ހިނގީ ވިނަރެސް ފްލެޓްތަކުގެ މެދަށް އޮންނަ މަގުން ބާރު ސްޕީޑުގައި ދުއްވި ކާރެއް ކޮންޓްރޯލުން ނެއްޓި، މަގުގެ އެއްފަރާތުގައި ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހިގެންނެވެ. އެކްސިޑެންޓަށްފަހު އިކްރާމާއި ކާރުގައި ތިބި އިތުރު ދެ މީހުން ވަނީ ފިލާފައެވެ. ނަމަވެސް އިކްރާމް އެރޭ ހައްޔަރުކުރެވުނެވެ.

ފަނޑިޔާރު މުޙައްމަދު ފައިޞަލް ރިޔާސަތު ބެލެހެއްޓެވި ޝަރީޢަތުން ނެރުއްވި އަމުރުގައި ވަނީ، އިކްރާމްގެ ވަކީލު އައްޔަންކުރިކަން އަންގާފައިވަނީ ޝަރީޢަތް ފެށުމަށްފަހުގައި ކަމަށާއި، އެހެންކަމުން އިކްރާމަށް ވަކީލެއްގެ އެހީތެރިކަން ލިބިފައިނުވާ ކަމަށެވެ. މިކަމަށް ރިޢާޔަތްކޮށް، ކުރިން ނެރުނު ބަންދު އަމުރު ވަނީ ބާޠިލުކޮށްފައެވެ.

މި އެކްސިޑެންޓާ ގުޅިގެން އިކްރާމްގެ އިތުރުން އިކްރާމުއްރަޙްމާނާއި ޖިނާޙް އިސްމާޢީލް ވެސް ވަނީ ހައްޔަރުކޮށްފައެވެ. އަދި ފާހަގަކޮށްލެވޭ ކަމަކީ، އެކްސިޑެންޓްވި ކާރަކީ މާލެ ޒޯންގައި ދުއްވަން ރަޖިސްޓްރީކޮށްފައިވާ އުޅަނދެއް ނޫންކަމެވެ. ކާރުގެ ނަންބަރު ޕްލޭޓްގައި އޮތީ ރާއްޖޭގެ އުތުރާއި ދެކުނުގެ އަތޮޅުތަކުގައި ދުއްވަން ރަޖިސްޓްރީކޮށްފައިވާ "ބީ ޒޯން" ގެ ނަންބަރެކެވެ.