ނަވާޒުއްދީން ސިއްދީޤީ ގެ "ތަކެރޭ" މި މަހު 25 ވަނަ ދުވަހު!

ތަޖުރިބާކާރު ބޮލިވުޑް އެކްޓާރ ނަވާޒުއްދީން ސިއްދީޤީ ގެ އައު ފެނިލުމެއް ވަނީ މި ނިމޭ ޖަނަވަރީ މަހުގެ 25 ވަނަ ދުވަހު ރިލީޒްކުރަން ހަމަޖެހިފައެވެ. މި ފިލްމުގައި ނަވާޒުއްދީނާއެކު މަޤްބޫލް އެކްޓްެރެސް އަމްރީތާ ރާއޯ ވެސް ހަރަކާތްތެރިވާއިރު، ފިލްމުގެ ވާހަކަ ބިނާވެފައިވަނީ ދެކުނު އިންޑިޔާގެ ސިޔާސީ ޝަޚްސިއްޔަތެއްކަމަށްވާ "ބާލް ތަކެރޭ" ގެ ހަޔާތުގެ މައްޗަށެވެ.

ބާލް ކޭޝަވް ތަކެރޭ އަކީ އިންޑިޔާގެ ރައިޓް-ވިންގް ނޭޝަނަލިސްޓް ސިޔާސީ ޕާރޓީއެއް ކަމަށްވާ ޝިވް ސޭނާ އުފެއްދީ ސިޔާސީ ލީޑަރެވެ. އޭނާގެ ސިޔާސީ ޙަޔާތް ފެއްޓުމުގެ ކުރިން އޭނާއަކީ ނޫސް މަޖައްލާއަކަށް ކުރެހުންތަކެއް ތައްޔާރުކޮށްދިން ކާރޓޫނިސްޓެކެވެ.

މުމްބައިގައި ދިރިއުޅެމުން އަންނަ މަރާޓީ މީހުންގެ ބާރު ފަނޑުވަމުންދިޔަ ސިޔާސީ ދަނޑިވަޅެއްގައި، އިސްކޮށް ޙަރަކާތްތެރިވެ މަރާޓީންގެ ހައްގުގައި ވަކާލާތުކުރަން ފެށި ބާލް ކޭޝަވް ގެ ދިރިއުޅުމުގައި، އޭނާއަށާއި އޭނާގެ އަންހެނުން މީނާ ތަކަރޭ އަށް ދިމާވާ ތަފާތު ކަންތައްތަކުގެ މައްޗަށް ތައްޔާރުކޮށްފައިވާ މި ފިލްމަށް ބައެއް ސިޔާސީ ފަރާތްތަކުން ދަނީ ހަރުކަށިކޮށް ފާޑުކިޔަމުންނެވެ.

އާދައިގެ މީހަކު ކުރިއަރައިގެން ގޮސް މުޅި ޤައުމުގެ މިސްރާބެ ބަދަލުކޮށްލާތަން ދައްކުވައިދޭން ފަސޭހައެއްނޫންކަން، މި ފިލްމު ޕްރޮމޯޓްކުރަމުން އަންނަ ނަވާޒުއްދީން ވަނީ ތަކުރާރުކޮށް ބުނެފައެވެ. އަދި ފިލްމަކީ އެއްވެސް ސިޔާސީ ބޭނުމެއް އޮވެގެން ތައްޔާރު ކުރި ފިލްމެއް ނޫންކަމާ، ހަމައެކަނި ތާރީހީ ސިޔާސީ ލީޑަރެއްގެ ހަޔާތަށާއި މަސައްކަތްތަކަށް އިންސާފްކުރުމުގެ ނިޔަތުގައި އުފެއްދި އުފެއްދުމެއްކަންވެސް އޭނާ ވަނީ ފާހަގަކޮށްފައެވެ.

ކުޅަދާނަ ފަންނާނުންކަމަށްވާ ނަވާޒުއްދީން އަދި އަމްރީތާ އެކީ މަސައްކަތްކުރާތަން ދެކިލުމަށް އެމީހުންގެ ފޭނުންގެ އިތުރުން ފިލްމުތަށް ދިރާސާ ކުރާ މާހިރުންވެސް ވަނީ ކެތްމަދުވެފައެވެ.