ކޮރަޕްޝަން މައްސަލަ ތަކަށް އަވަސް ފިޔަވަޅުތަކެއް އެޅުމަށް ވެރިކަންކުރާ ޕީއެންސީން ގޮވާލައިފި

ކޮރަޕްޝަންގެ ތުހުމަތުތަކާ ގުޅިގެން އަވަސް ތަޙުޤީޤެއް ހިންގައި، ކުށްވެރިންނާމެދު އަވަސް ފިޔަވަޅު އެޅުމަށް ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ގޮވާލައިފިއެވެ.

ޕީއެންސީން ނެރުނު ނޫސް ބަޔާނެއްގައި ބުނެފައިވަނީ، ޤައުމީ ފެންވަރުގައި ކޮރަޕްޝަނާ ދެކޮޅަށް ސަރުކާރުން ކުރަމުންދާ މަސައްކަތްތަކަށް އެ ޕާޓީން މަރުޙަބާ ކިޔާ ކަމަށެވެ. އަދި ކޮރަޕްޝަނާ ދެކޮޅަށް ކުރާ މަސައްކަތުގައި ރައީސް ޑރ. މުޙައްމަދު މުޢިއްޒުއަށް ރައްޔިތުންގެ އިތުބާރު ލިބުފައިވާކަން ފާހަގަކޮށްފައިވެއެވެ.

މި ބަޔާނުގައި އިތުރަށް ބުނެފައިވަނީ، ރައްޔިތުންގެ މަޖިލީހުގެ މާލިއްޔަތު ކޮމިޓީ، މޯލްޑިވްސް ޕޮލިސް ސަރވިސް (އެމްޕީއެސް) އަދި އެންޓި-ކޮރަޕްޝަން ކޮމިޝަން (އޭސީސީ) ފަދަ މިނިވަން މުއައްސަސާތަކުން ކުރަމުންދާ ތަޙުޤީޤުތަކުގައި މި ސަރުކާރުގެ ދައުރުގައި ފާހަގަކުރެވޭ ކުރިއެރުންތަކެއް ވަނީ ލިބިފައި ކަމަށެވެ. އަދި މި މުއައްސަސާތަކުން ކުރީގެ ސަރުކާރުގެ އިސް އޮފިޝަލުންތަކެއްގެ މައްޗަށް ކޮރަޕްޝަނާއި ދައުލަތުގެ ފައިސާ އަމިއްލައަށް ބޭނުންކުރުމުގެ ތަޙުޤީޤު ކުރަމުންދާކަން ފާހަގަކޮށްފައިވެއެވެ.

"މިފަދަ ތަޙުޤީޤުތަކަށް ވަގުތާއި ވަސީލަތްތައް ބޭނުންވާކަން ފާހަގަކުރާއިރު، ޕީއެންސީން މިނިވަން މުއައްސަސާތަކުން މި މައްސަލަތައް އަވަސް ކުރުމަށް ކުރަމުންދާ މަސައްކަތްތަކަށް ތަޢުރީފު ކުރަމެވެ،" މި ބަޔާނުގައި ބުނެފައިވެއެވެ.

އަދި ސިޔާސީ ނުފޫޒަކާ ނުލައި، ހުރިހާ ފަރާތްތަކެއްގެ މައްޗަށް ހަމަހަމަކަމާއެކު ޤާނޫނު ތަންފީޒުކުރުމަށް ސަރުކާރުން ދެމުންދާ އެއްބާރުލުމަށް ޕީއެންސީން ޝުކުރު އަދާކޮށްފައިވެއެވެ. މީގެ އިތުރުން، މިނިވަން މުއައްސަސާތައް ބާރުވެރިކުރުވުމަށް ސަރުކާރުން ކުރަމުންދާ މަސައްކަތްތަކަށްވެސް އެ ޕާޓީން ތަޢުރީފުކޮށްފައިވެއެވެ.

މިއާއެކު އެ ޕާޓީން ގުޅުންހުރި މުއައްސަސާތަކަށް ގޮވާލާފައިވަނީ ކުށްވެރިންނާމެދު ވަގުތުން ފިޔަވަޅު އަޅައި، އިންސާފު ޤާއިމުކުރުމަށެވެ.

ޕީ.އެން.ސީ އިން މޯލްޑިވްސް ޕޮލިސް ސަރވިސްއަށް އެދެނީ ޤާނޫނާ އެއްގޮތްވާ ގޮތުގެމަތިން ލަސްނުކޮށް އެ ފަރާތުގެ ހޯދުންތައް ރައްޔިތުންނާ ހިއްސާކުރުމަށެވެ.

އަދި އަދުގެ ސަރުކާރުން އެއްވެސް ސިޔާސީ ނުފޫޒަކަށް ބޯނުލަނބައި، ކޮރަޕްޝަނާ ދެކޮޅަށް ފިޔަވަޅު އަޅާނެ ކަމަށް ދިވެހި ރައްޔިތުންނަށް ޔަޤީންކަން އޮތް ކަމަށް ބުނެފައިވެއެވެ.